Presidentja e Kosovës, Vjosa Osmani me rastin e Ditës së Evropës ka thënë se është me rëndësi të kërkoj heqjen e masave të Bashkimit Evropian ndaj Kosovës.
E para e vendit tha se duhet të trajtohen me seriozitet politikat destabilizuese të Serbisë.
Derisa, ajo tha se kjo ditë përfaqëson një dëshmi të përkushtimit të palëkundur të Kosovës ndaj Evropës.
“Në Ditën e Evropës, reflektojmë mbi vlerat që qëndrojnë në themel të Republikës sonë dhe të Bashkimit Evropian: demokracinë, të drejtat e njeriut dhe sundimin e ligjit. Këto vlera kanë qenë dhe mbeten udhërrëfyes në rrugëtimin tonë drejt integrimit në Bashkimin Evropian, si dhe në forcimin e përditshëm të shtetit tonë.
Për popullin e Kosovës, kjo ditë përfaqëson një dëshmi të përkushtimit tonë të palëkundur, sepse ne besojmë në Evropë, pavarësisht sfidave dhe padrejtësive me të cilat përballemi gjatë këtij rrugëtimi. Në këtë ditë të shënuar, është me rëndësi që, me një zë, të kërkojmë heqjen e masave të padrejta të Bashkimit Evropian ndaj Kosovës, si dhe trajtimin me seriozitet të politikave destabilizuese të Serbisë—të cilat u bënë edhe më të dukshme edhe kur Vuçiq zgjodhi ta shënojë Ditën e Evropës në Moskë, pikërisht te Putini, ai që sot po rrezikon stabilitetin dhe sigurinë e kontinentit tone”, ka shkruar presidentja./teve1.info/
