Presidentja e Kosovës, Vjosa Osmani është nderuar me Urdhrin e Familjes Mbretërore “Datin Laila Utama”, gjatë vizitës shtetërore në Sulltanatin e Bruneit Darussalam.
Ky urdhër u jepet tradicionalisht udhëheqësve të huaj ndërkombëtar.
“Me këtë nderim, Presidentes Osmani i është dhënë gjithashtu edhe titulli honorifik “Datin Laila Utama”, i cili bart një nder të veçantë në protokollin shtetëror të Bruneit”, thuhet në njoftimin e Presidencës.
Në ceremoninë e pranimit, Osmani tha se ky është një simbol i fuqishëm i “respektit të ndërsjellë dhe i miqësisë që po ndërtohet në mes dy popujve”.
“Ky Urdhër dhe ky titull nuk është vetëm një vlerësim për mua, por mbi të gjitha një nderim për popullin e Kosovës. Jam thellësisht mirënjohëse për mikpritjen dhe respektin e treguar nga Sulltani dhe populli i Bruneit”, tha Osmani.
Siç bëhet e ditur në njoftim, këtë Urdhër mbretëror dhe titull prestigjioz e kishte marrë më parë edhe Mbretëresha Elizabeth II e Mbretërisë së Bashkuar./teve1.info/
