Presidentja e Kosovës, Vjosa Osmani ka kujtuar 26 vjetorin e Masakrës së Mejës.
Osmani e ka cilësuar si njërën nga plagët më të thella të Kosovës dhe ka thënë se kujtimi për martirët e Mejës do të jetojë përjetë.
Ajo ka shtuar se çdo person i vrarë e çdo person i zhdukur me dhunë gjatë luftës është betim për drejtësi.
“Sot, me zemër të rënduar, e kujtojmë Masakrën e Mejës, njërën nga plagët më të thella të Kosovës. 376 jetë të pafajshme u morën mizorisht nga regjimi gjenocidal i Serbisë, vetëm pse ishin shqiptarë. Plagët që la pas kjo tragjedi janë ende të hapura, por dhimbja dhe vendosmëria jonë, janë bashkuar për të mos lejuar që e vërteta të harrohet. Çdo person i vrarë e çdo person i zhdukur me dhunë gjatë luftës, çdo ëndërr e ndërprerë dhunshëm, është betim i yni për drejtësi. Në këtë tokë të shenjtë të dhimbjes, mbjellim shpresën për një të ardhme me më shumë drejtësi dhe më shumë dinjitet. Kujtimi për martirët e Mejës do të jetojë përjetë në zemrat tona. Lavdi jetës dhe sakrificës së tyre”, ka shkruar ajo në Facebook.
