Presidentja e Kosovës, Vjosa Osmani në adresimin e saj para deputetëve ka folur edhe për ruajtjen e raporteve me miqtë dhe partnerët ndërkombëtar.
Osmani ka thënë se bashkëpunimi me ta nuk nënkupton nënshtrim e as shantazhim.
Madje ajo ka thënë se rrezikimi apo luajtja bixhoz me raportet me miqtë cenon mbrojtjen e Republikës së Kosovës.
“Dobësimi i aleancave ose partneriteteve është një gabim strategjik. Të punosh bashkë me ata që na ndihmuan ta kemi lirinë e shtetit asnjëherë nuk është nënshtrim e shantazhim. Forca jon ëmë e madhe qëndron pikërisht në partneritet tona. Aleancat mes shteteve janë më të mëdha e më të rëndësishme se cilido prej nesh si politikan. .Aleancat janë këtu për të na mbrojtur, prandaj vënia në rrezik e tyre, luajtja bixhoz me to apo cenimi i tyre, e cenon vet mbrojtjen e Republikës sonë”, ka thënë Osmani ndër të tjera në fjalimin e saj para deputetëve, raporton teve1.info.
Osmani ka folur për respektim të Kushtetutës, duke thënë se ky është një patriotizëm.
“Sot më shumë se kurrë na duhet ajo që nihet si patriotizëm kushtetues i cili shkon përtej ndasive politike dhe kthehet te bazamenti i shtetësisë tonë, është ky lloj patriotzimi që na bashkon, jo pse ndajmë mendime të njëjta çdo herë, por se besojmë për të ardhmen mbi vlerat dhe parimet që na përbashkojnë. Kushtetuta jon është më shumë se një mjet juridik”, tha Osmani.
Osmani ka folur për punën që ka bërë si presidente në fuqizimin e shtetit të Kosovës
“Kam punuar në thellimin e aleancave dhe partneriteteve të afërta dhe të largëta, jam angazhuar që Kosova të jetë shembulli pozitiv kur demokracitë qëndrojnë të bashkuar. Kam punuar në forcimin e shtetësisë tonë, paqes dhe stabilitetit dhe për ta forcuar pozitën e Kosovës në skenën ndërkombëtare. Për herë të parë jemi ftuar në samite dhe organizata ku Kosova nuk është fare anëtare, siç ishte samiti i NATO-s dhe organizime të tjera ndërkombëtare ku u dëshmua se madhësia e një shteti nuk definohet nga territori dhe populli, por nga rrëfimi, shembulli që japim dhe vlerat që mbrojmë. Politika jonë e jashtme proaktive ka adresuar interpretimin dhe veprimet dashakeqëse të Serbisë në atë se çfarë përfaqëson dhe çka është në të vërtetë Kosova. Kosova e lirë, sovrane dhe demokrative është realitet i pakthyeshëm”, ka thënë ajo.
Osmani beson se asnjë president që kur u shpall Pavarësia nuk i ka pasur dyert më të hapura në botë sesa ajo.
Anëtarësimi në Këshillin e Evropës, avancimi për aplikimin për anëtarësim në Bashkimin Evropian dhe fillimi i procesit të anëtarësimit në NATO – duhet të jenë suksese në vitin 2025 për Kosovën, sipas Osmanit.
