Osmani përmes një postimi në Facebook ka thënë se liria mbanë emrat e Jusuf e Bardhosh Gërvallës e Kadri Zekës, raporton teve1.info
Osmani ka publikuar edhe fotografi nga pritja e familjes së Jusuf Gërvallës.
“Së bashku me Kryetarin Konjufca, u pritëm sot nga e bija e heroit Jusuf Gërvalla, Zv.kryeministrja Donika Gërvalla, në votrën e tyre, në Dubovik, ku nderuam kujtimin për shenjat e shenjta, të cilët përbëjnë fillet e luftës sonë për çlirim kombëtar. Liria mbanë edhe emrat e Jusufit, Bardhoshit e Kadriut, kurse ne mbajmë të skalitur emrat e tyre jo vetëm në kujtesë, por edhe si referencë se si një jetë e tërë vihet në shërbim të atdheut”, ka shkruar Osmani.
Tutje, presidentja Osmani theksoi se Jusufi ishte një zë i veçant në letërsi, gazetari e muzik, teksa shtoi se ishte zëri i të vërtetës dhe lirisë sonë.
“Jusufi ishte jo vetëm një zë i veçantë në letërsi, gazetari e muzikë, por mbi të gjitha zëri i të vërtetës dhe lirisë sonë! Ai lindi artist, veproi si patriot e vdiq si hero. Gërshetimi i këtyre tri tipareve e shndërroi Jusufin në një personalitet poliedrik, një ikonë të kohës, një patriot që ëndrrën për liri e projektoi herët”, u shpreh Osmani.
“I përjetshëm qoftë kujtimi për Jusuf e Bardhosh Gërvallën dhe Kadri Zekën”, shtoi ajo.
Kujtojmë se, sot janë bërë 41 vjet nga vrasja e vëllezërve Gërvalla dhe Kadri Zekës.
