Presidentja e Kosovës, Vjosa Osmani, po merr pjesë sot në Forumin “25 vjet nga kur gratë transformojnë paqen dhe sigurinë në Kosovë”, ku u diskutua roli i grave në proceset e paqes dhe sigurisë gjatë këtyre dekadave.
Në fjalën e saj, Osmani tha se Kosova ka dëshmuar se mund të kontribuojë shumë në këtë fushë, pavarësisht historisë së vështirë që ka kaluar gjatë luftës.
“Kosova ka dëshmuar ndër vite se mund të japë shumë në këtë fushë. Pavarësisht periudhave të vështira dhe të errëta që i përjetoi populli ynë gjatë luftës, ne arritëm të ringrihemi. Liria u ndërtua falë forcës dhe përkushtimit të grave dhe burrave tanë. Kjo histori qëndrese dhe bashkëpunimi tashmë po shndërrohet në shembull frymëzimi, të cilin Kosova çdo ditë e ndan në gjithë botën”, u shpreh Osmani
Osmani tha se ky vit jubilar që shënon 25 vjetorin e agjendës për gratë, paqen e sigurinë, nuk është thjesht një shënim kronologjik, por, sipas saj, një dëshmi e një kapitulli të tërë të rezistencës, të vizionit dhe të transformimit të një sistemi të tërë vlerash në sektorin që lidhë gratë me vlerat e paqes dhe misionin për forcimin dhe garantimin e sigurisë.
“Republika e Kosovës tashmë është shndërruar në sinonim të agjendës për gratë, paqen e sigurinë, si pjesë e angazhimit tonë të vazhdueshëm shtetëror. Sot me krenari shohim pjesëmarrjen gjithnjë në rritje në sektorin e sigurisë, gjersa kujtojmë kontributin e tyre të jashtëzakonshëm në rrugëtimin e lirisë dhe shtetformimit e shtetndërtimit, dhe e fuqizimit të institucioneve tona në vazhdimësi”, deklaroi presidentja Osmani.
