Presidentja e Kosovës, Vjosa Osmani ka dekoruar personalitetin botëror të sportit, Hasan Arat, në vlerësim të kontributit të tij të çmuar në sportin ndërkombëtar, si dhe të rolit dhe përkushtimit të tij në procesin e kandidimit të Kosovës për organizimin e Lojërave Mesdhetare Prishtina 2030.
Osmani theksoi se Arat ka dhënë kontribut të çmueshëm në promovimin e sportit të Kosovës në arenën ndërkombëtare, duke kulmuar me angazhimin e tij që Kosova ta fitojë të drejtën e organizimit të Lojërave Mesdhetare Prishtina 2030.
“Hasan Arat ka dhënë një kontribut të jashtëzakonshëm në mbështetjen e sportit ndërkombëtar dhe në veçanti për përkrahjen e vazhdueshme të Republikës së Kosovës. Kjo përfshirje dhe ky angazhim ka kulmuar me kontributin e tij vendimtarë në procesin e kandidaturës së Kosovës për organizimin e Lojërave Mesdhetare “Prishtina 2030”, një moment historik për shtetin tonë dhe për sportin kosovar. Prandaj në bazë të kompetencave të mia kushtetuese, si presidente e Republikës së Kosovës, kam vendosur që Hasan Aratin ta dekorojë me medaljen presidenciale të meritave, një nga dekorata më të larta të Republikës së Kosovës për personalitetet me kontribut të çmuar”, theksoi Osmani.
Nga ana e tij, Arat u shpreh se ndihet i nderuar me marrjen e medaljes presidenciale, duke shtuar se promovimin e Kosovës në arenën ndërkombëtare e bënë me shumë zell, derisa tha se populli i Kosovës duhet të ndihet krenar me të arriturat në sport si dhe me organizimin e Lojërave Mesdhetare që do të bëhet pas katër vitesh.
“Është shumë krenari e madhe për mua që ta mbaj këtë dekoratë, për shtetin tim, për familjen time dhe për veten time. Dhe dëshiroj t’ju falënderoj shumë për mikpritjen tuaj të ngrohtë, si dhe dua t’ju përgëzoj për arritjen tuaj për marrjen e Lojërave Mesdhetare 2030 në Prishtinë. Ne do ta mbështesim gjithmonë këtë ngjarje dhe ajo do të jetë një trashëgimi e madhe për popullin e Kosovës dhe ju do të jeni krenarë për të”, u shpreh Arat.
Arat është biznismen dhe adminsitrator sportiv nga Turqia, por me prejardhje shqiptare. Në karrierën e tij sportive ka qenë basketbollist, ndërsa si udhëheqës është anëtar i Komitetit Olimpik të Evropës, ish-nënpresident i Komitetit Olimpik të Turqisë, kryetar i komisionit koordinues për Lojërat Evropiane Krakoë 2023, udhëheqës i kandidaturës së Stambollit për organizimin e LO 2020, ish-anëtar i komisioneve të ndryshme në IOC e ANOC, anëtar i Komitetit Ekzekutiv në Federatën Botërore të Atletikës, etj. Së fundi (2023-2024), për më shumë se një vit ishte president i klubit të madh turk të futbollit, Beshiktash.
