Presidentja e Republikës së Kosovës, Vjosa Osmani në kuadër të vizitës zyrtare në Kroaci, është takuar me kryetarin e Parlamentit kroat, Gordan Jandroković dhe kryeministrin e këtij vendi, Andrej Plenković, ku ka thënë se në mënyrë që paqja të jetë e mundur në rajon, Serbia duhet t’i tërheq trupat ushtarake nga kufiri me Kosovën, raporton teve1.info
Sipas njoftimit për medie të Presidencës, Osmani në takime të ndara me kryeparlamentarin dhe kryeministrin kroat, ka diskutuar për zhvillimet e fundit në veri të Kosovës, derisa ka kërkuar që Serbia të mbahet përgjegjëse për sulmet në veri.
“Sa i përket sulmit terrorist dhe aktit të agresionit të Serbisë ndaj Kosovës, Serbia duhet të sanksionohet nga komunitetit ndërkombëtar për këto veprime”, theksoi Presidentja. Në të njëjtën kohë, Presidentja Osmani ka theksuar domosdoshmërinë e tërheqjes së trupave ushtarake serbe nga kufiri me Kosovën dhe në këtë kontekst, ka falënderuar NATO-n për dërgimin e trupave shtesë me qëllim të rritjes së sigurisë përgjatë kufirit Kosovë-Serbi.
Ndërkohë në takim me kryeministrin e Kroacisë, Andrej Plenković, Osmani tha se ka diskutuar lidhur me provat e mbledhura nga policia e Kosovës e të cilat e lidhin drejtpërdrejt Serbinë me këtë sulm.
“Presidentja Osmani ka theksuar se në mënyrë që paqja të jetë e mundur në rajon, Serbia duhet t’i tërheq trupat ushtarake nga kufiri me Kosovën, ngase përbëjnë rrezik për paqen dhe stabilitetin. Për më tepër, ajo ka diskutuar me kryeministrin kroat edhe për provat e mbledhura nga policia e Kosovës që e lidhin drejtpërdrejt Serbinë me këtë sulm si dhe për bashkëpunimin e institucioneve të sigurisë me aleatët tanë në mënyrë që të parandalohet agjenda destabilizuese e Serbisë.
Në këtë takim, ndër të tjera, Presidentja Osmani ka falënderuar kryeministrin Plenković për kontributin e ushtarëve kroatë në misionin e KFOR-it në Kosovë dhe bashkëpunimin bilateral ne fushën e mbrojtjes mes Kosovës dhe Kroacisë teksa kanë diskutuar për mundësitë e thellimit të bashkëpunimit në këtë fushë”, thuhet në komunikatën e Presidencës.