Presidentja e Kosovës, Vjosa Osmani priti në takim të dërguarin e posaçëm të Gjermanisë për Ballkanin Perëndimor, Manuel Sarrazin.
Në këtë takim Osmani ka kërkuar vazhdimin e mbështetjes gjermane për rrugën euroatlantike të Kosovës.
“Presidentja Osmani shtroi nevojën për vazhdimin e mbështetjes gjermane për forcimin e pozitës ndërkombëtare të Kosovës si dhe përmbushjen e aspiratave për anëtarësim në Këshillin e Evropës, NATO, BE dhe organizata të tjera ndërkombëtare”, thuhet në komunikatën e Presidencës.
Në takim bëhet e ditur se është biseduar për zhvillimet e fundit politike dhe të sigurisë në vend dhe rajon.
Presidentja Osmani theksoi përkushtimin e Kosovës në procesin e integrimit evropian, duke shprehur mirënjohjen për mbështetjen e Gjermanisë.
Ajo, në veçanti theksoi mbështetjen e plotë për Procesin e Berlinit dhe marrëveshjet e dalura nga ky proces. /teve1.info/
