Presidentja e Kosovës, Vjosa Osmani, në takim me Ndihmës Sekretarin amerikan për Byronë Ndërkombëtare të Narkotikëve dhe Çështjeve të Zbatimit të Ligjit, Todd Robinson, e ka informuar për synimin strategjik të Kosovës për anëtarësim në Interpol.
Teksa dha detaje për diskutimet gjatë takimit me zyrtarin e lartë amerikan, Osmani deklaroi se anëtarësimi i Kosovës në Interpol do të jetë i pamundur pa mbështetjen e vazhdueshme të Shteteve të Bashkuara të Amerikës.
“Në takim ndihmës sekretarin po ashtu e informova për synimin strategjik të Republikës së Kosovës për anëtarësim në Interpol, anëtarësim i cili do të jetë i pamundur pa mbështetjen e vazhdueshme të ShBA-së. Ky anëtarësim do të kontribuonte thellësisht në rritjen e kapaciteteve tona, duke e përmirësuar përgjigjen tonë institucionale ndaj krimit dhe duke fuqizuar angazhimin tonë në drejtim të garantimit të sigurisë publike për secilin qytetar pa dallim”, potencoi Osmani në konferencë për media.
Po ashtu, presidentja tha se mbështetja e Byrosë Ndërkombëtare të Narkotikëve dhe Çështjeve të Zbatimit të Ligjit, ka fuqizuar mekanizmat kryesor për sundimin e ligjit në Kosovë.
“Mbështetja e ShBA-ve për Kosovën, ka qenë prezentë në çdo sektor strategjik dhe në çdo hap të procesit të shtet ndërtimit. Në këtë drejtim, edhe mbështetja që kemi pranuar nga byroja që udhëheq ndihmës sekretari, shquhet për kohëzgjatjen, për dinamikën si dhe për shumëllojshmërinë e Asistencës, përmes së cilës janë themeluar dhe fuqizuar mekanizmat tanë kryesor për sundimin e ligjit në Kosovë”, theksoi tutje Osmani.
Duke përmendur sukseset e Kosovës në luftën kundër krimit të organizuar, luftën kundër trafikimit, Osmani vlerësoi se këto janë dëshmi e fuqisë së bashkëpunimit të Kosovës me partnerë të rëndësishëm.
“Në përpjekjet tona të përbashkëta në luftën kundër narkotikëve, në luftën kundër krimit të organizuar, në luftën kundër trafikimit, e njëkohësisht kanë kontribuar edhe në forcimin e kapaciteteve të Kosovës për sundim të ligjit që është prioritet i institucioneve tona. Këto suksese janë dëshmi e fuqisë së bashkëpunimit me partner, janë rezultat i bashkëpunimit tonë me partner rëndësishëm, siç është Byroja”, theksoi presidentja më tej.
Kujtojmë se Robinson sot ndodhet në vizitë zyrtare në Kosovë.
Zyrtari i lartë amerikan, pritet të ketë takime edhe me përfaqësuesit e Sistemit Gjyqësor, atij Prokurorial dhe të Shërbimit Korrektues.
