Kuvendi i Kosovës sot ka mbajtur seancë solemne në nderim të komandantin të UÇK-së Ilaz Kodra, dhe 315 dëshmorë e martirë që ranë në Drenicë për lirinë e Kosovës më 30 prill 1999-të.
Presidentja, Vjosa Osmani ka thënë se Kodra bashkë më bashkëluftëtarët luftuan me trimëri dhe guxim kundër regjimit të Millosheviqit.
Tutje, Osmani ka thënë se kauza e Ilaz Kodrës ishte liria, ndaj ai ra për liri dhe shtet.
“Sot jemi mbledhur për të nderuar dhe kujtuar komandantin e Ushtrisë Çlirimtare të Kosovës për Zonën e Drenicës, Ilaz Kodrën, sikurse edhe 315 dëshmorë e martirë të rënë me 30 prill 1999 në Drenicë… Kodra bashkë më luftëtarë luftuan me trimëri dhe guxim bashkë deri në flijim. Bashkëluftëtari i Adem Jasharit në këtë përpjekje të mbrojtjes se popullsisë civile dhe të Kosovës nga regjimi gjenocidal i Millosheviqit ra heroikisht në këtë betejë së bashku me 42 luftëtarë të UCK-së. Heroi, Ilaz Kodra ndoqi idealin e Komandant Ademit duke e konsideruar lirinë si vlerë të panegociueshme dhe sublime të popullit të tij… Kauza e tij ishte liria, ndaj ai ra për liri dhe shtet”, ka thënë presidentja me rastin e fjalës në Kuvend.
Me tej, Osmani tha se Kodra e dëshmorët e tjerë të UÇK-së, do të vazhdojnë të jenë jo vetëm udhërrëfyes por edhe frymëzues se si duhet dhe mbrohet atdheu.
“Ata janë dëshmi e luftës tonë të drejt dhe riafirmimit të së vërtetës sonë se në vitet e 90, Kosova ishte viktimë e agresionit serb, kurse, Serbia ishte agresore. Do ta themi dhe mbrojmë gjithnjë këtë të vërtet dhe do të punojmë fort dhe drejtësia të vihet në vend. Heroi Ilaz Kodra dhe dëshmorët e tjerë të UÇK-së, do të vazhdojnë të jenë jo vetëm udhërrëfyes por edhe frymëzues se si duhet dhe mbrohet atdheu“, tha ajo.
