Presidentja e Kosovës, Vjosa Osmani, në takim me raportuesen e Kosovës në Parlamentin Evropian, Viola von Cramon, i ka rikujtuar rëndësinë e largimit të masave të Bashkimit Evropian.
Sipas njoftimit nga Presidenca, thuhet se Osmani i ka quajtur të padrejta masat, duke shtuar se ato krijojnë disbalanc në dialogun Kosovë-Serbi.
“Me këtë rast, Presidentja Osmani foli për rëndësinë që BE-ja të lëvizë përpara në raport me Kosovën përmes dhënies së statusit të vendi kandidat. Po ashtu, Presidentja Osmani potencoi edhe njëherë rëndësinë e largimit të masave të BE-së, të cilat janë ende në fuqi, duke ritheksuar padrejtësinë e këtij vendimi si dhe disbalancin të cilin e krijojnë ato në pozicionimin e palëve në dialog. Ndërlidhur me këtë çështje, Presidentja Osmani konfirmoi se Kosova mbetet palë e përkushtuar për zbatimin e plotë të marrëveshjeve”, thuhet në njoftimin e Presidencës.
Po ashtu, bëhet e ditur se gjatë takimit, ato kanë diskutuar edhe për zhvillimet e fundit në Kosovë, sidomos për sigurinë dhe punën e institucioneve të Kosovës, sa i përket rrugëtimit të integrimit në Bashkimin Evropian./teve1.info/.
