Presidentja e Kosovës, Vjosa Osmani, ka folur sërish lidhur me gjyqtarin e Gjykatës Kushtetuese, Radomir Llaban, për të cilin ajo ka ngritur shqetësime rreth rolit dhe së kaluarës së tij.
Ajo ka bërë të ditur se që nga viti 2021, Presidenca ka dërguar në Gjykatën Kushtetuese informacione dhe prova për aktivitetet e tij, që sipas saj cenojnë sigurinë kombëtare e madje thotë se akoma provat po shtohen dita ditës.
“Në këtë rast, gjyqtar nuk është Llaban, është dikush tjetër – kushdo qoftë ai, sepse nuk ka rëndësi kush, sepse për asnjë tjetër nga gjyqtarët e Kushtetueses institucionet tona të sigurisë nuk kanë sjell informata kredibile dhe tashmë të rikonfirmuara për pesë vite me radhë së paku, se përbën rrezik për sigurinë kombëtare. Sa i përket gjyqtarit Llaban, si presidente e Republikës kam ndërmarrë të gjitha masat që janë në kompetenca të mia. Nga viti 2021 e tutje, vazhdimisht e kam informuar Gjykatën Kushtetuese për këto prova, të cilat sa po vijnë e po shtohen. Pra, nuk është që Gjykata Kushtetuese nuk ka qenë e informuar për veprimtarinë e tij”, tha ajo para gazetarëve.
Sipas saj, Kushtetuta nuk i jep kompetencë presidentit të shkarkojë një gjyqtar të Kushtetueses pa një vendim paraprak të vetë gjykatës, i cili kërkon shumicën prej dy të tretave.
“Sipas Kushtetueses nuk mund ta shkarkoj një gjyqtar cilido qoftë ai pa u marrë një vendim i tillë paraprakisht nga vetë Gjykata Kushtetuese me 2/3 dhe një gjë e tillë ende nuk ka ndodhu. E treta, unë nuk jam as prokurori e as polici me ia lidh dikujt duart. Unë i shprehi shqetësimet i informoj të gjitha institucionet relevant. Prokuroria e ka detyrën e vetë, Policia e ka detyrën e vetë, gjyqësori e ka detyrën e vetë. As nuk ndërhyj në punën e tyre, as nuk mund t’ua marr unë atyre punën. Por, gjithçka që është dashur ta dinë e kanë ditur edhe institucionet e rendit dhe ligjit edhe institucionet e drejtësisë. Të gjithë kanë qenë të informuar lidhur me këtë. A përbën shqetësim të përgjithshëm që ai person është akoma gjyqtar në Gjykatën Kushtetuese, absolutisht. Do të duhej të përbënte shqetësim jo vetëm për ne si institucione por për çdo qytetar të Kosovës”, deklaroi ajo tutje.
Presidentja shtoi se fakti që Llaban ende është gjyqtar në Gjykatën Kushtetuese duhet të shqetësojë jo vetëm institucionet, por edhe çdo qytetar të Kosovës.
