Presidentja Vjosa Osmani e ka cilësuar organizimin e Kampionatit Evropian të Xhudos në Kosovë si një ngjarje tejet të rëndësishme përmes së cilës edhe shpalosen vlerat kulturore të vendit.
Ajo ka thënë gjithashtu që sporti është pjesë thelbësore e sukseseve të Kosovës në përgjithësi.
“Sporti është pjesë thelbësore e kulturës dhe e suksesit të vendit tonë, prandaj organizimi i kampionatit këtu, në kryeqendrën e Kosovës shërben si platformë për ta ndërthurur krenarinë me sukseset e sportistëve tanë duke bërë që kampionati të jetë një ngjarje e pa harrueshme për sportin kosovar. Federata e Xhudos së Kosovës meriton vlerësim të veçantë për punën e jashtëzakonshme ndër vite, për arritjen e rezultateve dhe për organizimin e këtij kampionati.”, tha Osmani.
Ndërsa ministri i Ministrisë së Kulturës, Rinisë dhe Sportit, Hajrulla Çeku theksoi se me këtë organizim po dëshmohet që Kosova ka kapacitete të mëdha për të organizuar evenimente të mëdha sportive.
“Dua ta potencoj një fakt këtu para nënkryetarit të Federatës Evropiane që na ka besuar këtë organizim, i kemi premtuar që nuk do t’i zhgënjejmë, nuk i kemi zhgënjyer, prandaj faleminderit shumë IJU që i ka befasuar Federatës së Xhudos në Kosovë dhe kjo pjesëmarrje këtu e të gjithë juve është dëshmia më e mirë që ne jo vetëm që dimë të organizojmë por edhe duam sportin, e duam xhudon.”, theksoi çeku.
Zëvendëspresidenti i Federatës Evropiane të Xhudos, Otto Kneitinger, është shprehur i kënaqur sa edhe i befasuar me organizimin e Kampionatit Evropian të Xhudos që ka bërë Kosova për këtë vit.
“Në emër të Unionit të xhudos evropiane dhe presidentit tonë ju dëshiroj mirëseardhje të gjithë juve, dhe më vjen keq për zotin president, ai është shumë i sëmurë dhe është një nga iniciatorët për mbajtjen e këtij eventi në Kosovë. Pra, përshëndetje për ju dhe ju falënderoj federatën kosovare të xhudos në këtë mënyrë… Dëshiroj t’ju falënderoj në emër të të gjithë lojtarëve për atë që keni bërë këtu në Kosovë…Ju keni krijuar programin e xhudos në vendin e Kosovës. Kjo është shumë e rëndësishme për sportin tonë dhe federatën kosovare të xhudos, por po ashtu edhe për Unionin e Xhudos Evropiane. Ne jemi krenar mbi atë që kemi parë këtu, organizimi ishte perfekt, pritjet ishin perfektë”, tha Kneitinger.
Në këtë kampionat, Kosova po përfaqësohet nga Akil Gjakova, Dardan Cena, Distria Krasniqi dhe Nora Gjakova. /kp
