Presidentja e Kosovës, Vjosa Osmani ka thënë se është në interes që sa më parë të formohet qeveria e re me mandat të plotë.
Ajo ka thënë se Kuvendi është i konstituuar pas aktgjykimit të fundit të Gjykatës Kushtetuese, duke thënë se vonesat që po përpiqet t’i bëjë Lista Serbe janë në dëm të Kosovë.
“Është në interes të Kosovës që sa më parë, tash pasi që Kuvendi është konstituuar në përputhje me aktgjykimin e fundit të Gjykatës Kushtetuese, të kemi qeveri me mandat të plotë. Krijimi i qeverisë varet krejtësisht nga koalicionet e partive politike, unë aty si presidente nuk mund të ndërhyj. Vonesa e krijuar që po tentohet të krijohet nga Lista Serbe i dëmton interesat jo vetëm të Kosovës si shtet, por të gjithë qytetarëve, përfshirë edhe serbët”, tha Osmani të hënën për media në Prishtinë.
Osmani ka folur edhe për situatën nëse partitë nuk sigurojnë shumicën për formimin e Qeverisë, ku ka thënë se për këtë janë afatet kushtetuese të caktuara.
Kryeministri në detyrë i Kosovës, Albin Kurti vazhdimisht ka thënë se i ka votat për formimin e Qeverisë Kurti3.
Kanë mbetur 6 ditë nga afati kur duhet të thirret seanca për votimin e qeverisë, deri tash Kurti nuk ka njoftuar se ka zhvilluar bisedime me ndonjë parti politike për bashkëqeverisje.
Nisma Socialdemokrate shihet si partneri më i mundshëm i LVV-së për ta formuar qeverinë.
