Presidentja e Kosovës, Vjosa Osmani, e ka quajtur ndërhyrje të Serbisë në procesin zgjedhor të Kosovës, mosdaljen në votimin e sotëm në katër komunat veriore, raporton teve1.info
Në votimin e sotëm, Osmani tha se qytetarëve të komunave të veriut iu dha mundësia që t’i largojnë kryetarët aktual dhe t’i zgjedhin kryetarët e rinj.
“Qytetarët në masë të madhe nuk e shfrytëzuan këtë mundësi. Për fat të keq, kjo kryesisht ndodhi për shkak të presionit të Beogradit, të ekzekutuar nga Lista Serbe dhe strukturat ilegale kriminale. Edhe njëherë, Serbia kreu ndërhyrje të paligjshme në një proces zgjedhor të një shteti tjetër. Edhe njëherë, Vuçiqi shkeli fjalën që ua kishte dhënë partnerëve ndërkombëtarë”, tha Osmani.
Megjithatë ajo shtoi se Kosova tregoi maturi.
“Por, Kosova sërish dëshmoi maturi, organizim e respektim të plotë të ligjeve e kushtetutës, duke ju ofruar të gjitha komuniteteve, pa dallim, mundësinë që ata të zgjedhin vetë se kush dëshirojnë t’i përfaqësojë. E falënderoj Komisionin Qendror të Zgjedhjeve, institucionet tona të sigurisë, si dhe partnerët tanë për punën, përkushtimin dhe bashkëpunimin”, tha Osmani.
