Presidentja e Kosovës, Vjosa Osmani, deklaroi se Forca e Sigurisë së Kosovës (FSK) e ka dëshmuar se është një aleat i gatshëm të bashkëpunojë me ShBA-në dhe shtetet tjera.
Këtë deklaratë Osmani e tha në Poligonin e Stërvitjes në Babaj të Bokës, në Gjakovë, ku po mbahet Dita e Vizitorëve të Shquar, në kuadër të ushtrimit të madh ndërkombëtar “Defender Europe ‘25”.
“Jemi të gatshëm jo vetëm të kontribuojmë në operacione të tilla, por njëkohësisht të jemi shtet i barabartë dhe shtet anëtarë i NATO-s. Dua t’i falënderoj gjeneralët e SHBA-së që janë jo vetëm sot, por që janë një kohë të gjatë me ushtarët tanë në trajnime e përgatitje”, ka deklaruar ajo.
Ndërkohë, kryeministri në detyrë, Albin Kurti, ka deklaruar se pjesëmarrja e Forcës së Sigurisë së Kosovës në ushtrimin e përbashkët ushtarak “Defender 2025” është dëshmi e bashkëpunimit të ngushtë me aleatët e NATO-s dhe e përkushtimit të vendit për anëtarësim në këtë aleancë.
Kurti ka theksuar se përmes këtij ushtrimi është treguar fuqia vepruese e Kosovës dhe aftësia për të kontribuar në sigurinë rajonale dhe më gjerë.
“Në këtë rast konkretisht, Republika e Shqipërisë, Kroacisë, Maqedonisë së Veriut dhe Bullgarisë, bashkë me ne, kemi arritur të tregojmë dhe demonstrojmë fuqinë tonë për veprueshmërinë që e kemi me NATO-n. Në këtë mënyrë e forcojmë kauzën tonë se anëtarësimi i Kosovës në NATO nuk është vetëm për dobi të vendit tonë, por edhe për kontributin që jemi në gjendje të japim,” u shpreh Kurti.
Ndërkaq, të pranishëm në ushtrim janë edhe drejtuesit e institucioneve shtetërore si dhe përfaqësues të vendeve të NATO-s e oficerë të lartë të Forcës së Sigurisë së Kosovës dhe shteteve pjesëmarrëse.
“Defender ‘25” është ushtrim që udhëhiqet nga ushtria amerikane dhe është stërvitja më e madhe që zhvillohet në Evropë, me përfshirjen e më shumë se 25 mijë trupave nga SHBA-ja dhe vendet partnere.
Ushtrimi në vend ka nisur nga 25 maji ku Kosova përveç si mikpritëse, po merr pjesë edhe me afërsisht 1 mijë pjesëtarë të Forcës së Sigurisë së Kosovës.
