Presidentja e Kosovës, Vjosa Osmani, gjatë Konferencës së Sigurisë në Mynih, është takuar me presidentin e Letonisë, Egils Levits.
Gjatë këtij takimi u diskutua edhe për procesin e anëtarësimit të Kosovës në Këshillin e Evropës dhe rritjen e bashkëpunimit për të avancuar në këtë proces, ku Letonia do të marrë zyrtarisht Presidencën e KiE-së, nga muaji maj.
“Presidentja Osmani dhe Presidenti Levits u dakorduan për intensifikim të bashkëpunimit në muajt në vazhdim për ta avancuar procesin e anëtarësimit të Kosovës në Këshillin e Evropës, ku Letonia merr zyrtarisht Presidencën që nga muaji maj i këtij viti”, thuhet në komunikatë
Në këtë takim sipas komunikatës së Presidencës u diskutua edhe për mbështetjen e këtij vendi për Kosovën, ku Osmani tha se Letonia vazhdon të jetë aleate e Kosovës.
“Presidentja Osmani ka falënderuar Presidentin Levits për angazhimin e tij dhe mbështetjen e vazhdueshme për Kosovën në skenën ndërkombëtare, përfshirë në proceset e anëtarësimit në strukturat euroatlantike dhe organizata të tjera ndërkombëtare, ndërsa ka theksuar se Letonia mbetet mike dhe aleate e fortë e Republikës së Kosovës”, thuhet në komunikatën e Presidencës.
Presidentja e informoi Presidentin Levits mbi situatën aktuale të sigurisë në Kosovë dhe në rajon, si dhe zhvillimet e fundit në dialogun me Serbinë. Ajo tha se Kosova vazhdon të kontribuoj në mënyrë aktive në procese të paqes dhe stabilitetit./teve1.info/
