Presidentja e Kosovës, Vjosa Osmani i ka cilësuar të papranueshme dhe cenim të bashkëjetesës e respektit të ndërsjellë thirrjet antishqiptare në ndeshjen Maqedoni e Veriut – Rumani, e zhvilluar në Kumanovë.
Përmes një deklarate për media, Osmani ka thënë se shqiptarët janë popull autokton në trojet e tyre që meritojnë të trajtohen me dinjitet dhe barazi, sikurse çdo komunitet tjetër.
“Thirrjet antishqiptare të dëgjuara gjatë ndeshjes në Kumanovë janë të papranueshme dhe cenojnë frymën e bashkëjetesës dhe respektit të ndërsjellë, që duhet të jenë themel i çdo shoqërie demokratike me aspirata evropiane. Shqiptarët janë popull autokton në trojet e tyre si dhe meritojnë të trajtohen me dinjitet dhe barazi, ashtu si çdo komunitet tjetër”, ka thënë Osmani.
Tutje, ajo ka kritikuar zyrtarët më të lartë të Shkupit për mosreagim ndaj siç është shprehur ‘kësaj gjuhe urrejtëse dhe përjashtuese’.
“Edhe më shqetësues mbetet fakti që zyrtarët më të lartë shtetërorë në Shkup nuk kanë reaguar ndaj kësaj gjuhe urrejtëse e përjashtuese, duke lënë hapësirë për retorika që minojnë tolerancën ndëretnike dhe harmoninë që vendi synon të ndërtojë në rrugën e tij drejt familjes evropiane. Sporti duhet të jetë mjet bashkimi, jo platformë për ideologji të errëta që ngjallin kujtime të dhimbshme dhe kërcënojnë paqen”, ka theksuar ajo.
Osmani u ka bërë thirrje institucioneve të Maqedonisë së Veriut që të ndërmarrin masa të menjëhershme kundër organizatorëve të këtyre thirrjeve.
“U bëjmë thirrje institucioneve të Maqedonisë së Veriut që të ndërmarrin masa të menjëhershme kundër organizatorëve të këtyre thirrjeve, përgjegjësve dhe atyre që nxisin e përhapin urrejtje, duke dënuar çdo formë të gjuhës së urrejtjes , mbrojtur parimet e bashkëjetesës dhe tolerancës, si vlera bazë të një shteti që synon integrimin në BE”, ka apeluar Osmani.
Në fund të deklaratës, presidentja Osmani ka theksuar se Republika e Kosovës do të mbrojë me vendosmëri dinjitetin e shqiptarëve, kudo që ata jetojnë.
Ndryshe, në ndeshjen e të shtunës në Kumanovë, të cilën Maqedonia e Veriut e humbi 80:72, pati thirrje e sllogane antishqiptare.
“Le ta kuptojnë shqiptarët e mallkuar, emri maqedonas nuk do të zhduket. Maqedoni e pastër, e pastër, e pastër”, thërrisnin një pjesë e tifozëve në tribunë.
