Presidentja e vendit, Vjosa Osmani, është takuar sot, me ambasadorët e vendeve të QUINT-it dhe shefin e zyrës së BE-së.
Në këtë takim, sipas njoftimit nga presidenca është folur për zhvillimet e fundit në vend, përfshirë dialogun me Serbinë hapat e mëtutjeshëm si dhe koordinimin e vazhdueshëm të institucioneve të Kosovës me aleatë, raporton teve1.info.
“Presidentja Osmani potencoi se dakordimi rreth aneksit për zbatimin e marrëveshjes bazë duhet të ketë parasysh parimet e miratuara në Kuvendin e Republikës së Kosovës rreth paprekshmërisë së sovranitetit, integritetit territorial, kushtetutshmërisë dhe funksionalitetit të shtetit të Kosovës”, thuhet në njoftim.
Presidentja ka theksuar se Kosova vazhdon të mbetet palë konstruktive karshi dialogut me Serbinë.
“Osmani theksoi se Kosova vazhdon të mbetet palë konstruktive karshi dialogut me Serbinë, dhe vazhdon të jetë e përkushtuar për një proces i cili kontribuon në paqe, siguri dhe prosperitet të qëndrueshëm në vend e rajon”.
Në këtë takim kishin marrë pjesë ambasadori i Mbretërisë së Bashkuar, Nicholas Abbott, ambasadori i Gjermanisë, Jorn Rohde, ambasadori i Italisë, Antonello De Riu, ambasadori i Francës, Olivier Guerot, zëvendës Shefen e Misionit të Shteteve të Bashkuara, Alyson Grunder, si dhe Shefi i Zyrës së BE-së në Kosovë, Tomas Szunyog.
