Osmani gjatë fjalimit të saj theksoi se anëtarësimi i Kosovës në NATO është domosdoshmëri dhe se në këtë drejtim po punojnë në përgatitjen më të mirë të ushtrisë së Kosovës.
“Agresoni i Rusisë këto ditë po tregon gjithmonë se do të gjinden forca që do të duan ta shkatërrojnë paqen dhe duan ta cenojnë lirinë dhe të drejtën e kombeve për të jetuar të lirë. Ne e kemi provuar të njëjtën gjë më parë prandaj nuk do të ndalemi asnjëherë që ushtrinë tonë ta përgatisim sa më mirë dhe ta rrisim sa më shumë në mënyrë që ajo të jetë të gatshme jo vetëm për sigurinë e shtetit tonë por edhe një partnere e besueshme e aleatëve tanë në NATO, aleancë në të cilën synojmë të anëtarësojmë Republikën e Kosovës. Anëtarësimi në NATO është domosdoshmëri dhe i ndihmon paqes dhe stabilitetit rajonal. FSK çdo ditë e më tepër po shndërrohet në forcë ushtarake profesionale dhe ndërvepruese me forcat e NATO-s falë këmbëngulësisë të pjesëtarëve të saj dhe mbështetje të përhershme nga institucionet e vendit, por edhe nga aleatet tanë perëndimor e para se gjithash nga SHBA-ja”, tha Osmani.
Ajo iu drejtua edhe ushtarëve të rinj, duke u thënë se me ta rritet siguria dhe garancia për një të tashme e të ardhme më të mirë.
“Me ju sot nuk po e rrisim vetëm numrin e efektivëve të ushtrisë sonë, por edhe sigurinë dhe garancinë për një të tashme e të ardhme më të mirë, sytë tanë janë sot nga ju, shpresa jonë është e varur tek ju, synimi ynë është paqja dhe nuk duhet të lejojmë që ajo të na cenohet nga askush. Objektivi ynë është BE-ja, është NATO dhe organizata tjera ndërkombëtare ku Kosova e meriton të jetë, të cilat e forcojnë edhe më tej subjektivitetin ndërkombëtar të shtetit tonë krahas forcimit të kompetencës të mbrojtjes dhe sigurisë”, u shpreh Osmani.
Presidentja e vendit ndër tjerash tha se ushtria jonë po i shton radhët me vajzat dhe djemtë të rinj që atdhedashurinë po e transformojnë edhe në profesionalizëm. Derisa ka inkurajuar vajzat dhe gratë që sa më shumë të bëhen pjesë e ushtrisë./kp/.
