Presidentja e Kosovës, Vjosa Osmani ka thënë se 14 prilli është një ditë e kërkimit të drejtësisë dhe ngritjes së zërit për mijëra gra, burra e fëmijë, që përjetuan dhunën seksuale gjatë luftës nga regjimi gjenocidal i Serbisë.
Osmani nëpërmjet një postimi në Facebook është shprehur se qëndresa dhe guximi i tyre janë inspirim për secilin njeri.
Ajo ka shtuar se Vasfije Krasniqi-Goodman, Shyrete Tahiri-Sulimanin e tani edhe Ramadan Nishori zgjodhën të bëhen zë për veten dhe për të gjithë ata që ende nuk mund të flasin.
“14 prilli është një ditë që nuk është vetëm kujtim, por edhe kërkim drejtësie, ngritje e zërit për mijëra gra, burra e fëmijë, që përjetuan dhunën seksuale gjatë luftës nga regjimi gjenocidal i Serbisë. Qëndresa dhe guximi i tyre janë inspirim për secilin prej nesh. Vasfija, Shyretja e shumë gra të tjera, e tani Ramadan Nishori e shumë burra, asnjëherë nuk u dorëzuan përballë dhimbjes. Zgjodhën të bëhen zë për veten dhe për të gjithë ata që ende nuk mund të flasin. U bënë zëri i së vërtetës dhe i drejtësisë. Do të jemi me të gjithë të mbijetuarit sot e çdo ditë, në këtë rrugëtim. Plagët janë ende të hapura, por lufta jonë për drejtësi nuk do të ndalet kurrë”, ka shkruar ajo./teve1.info/
