Egzon Osmanaj nga Fondacioni Friedrich Ebert (FES), ka komentuar në emisionin “Info Nata” në Tevë1 veprimin e ministrit të Financave, Hekuran Murati, i cili publikoi emrat e gjyqtarëve që kanë marrë vendimin e fundit të Gjykatës Supreme.
Osmanaj e cilësoi këtë reagim si të gabuar dhe të rrezikshëm për kredibilitetin e institucioneve të drejtësisë.
“Nuk ishte një vendim i duhur. Këto veprime janë në kundërshtim me ligjin. Duhet të kemi kujdes sepse shumë shpejt mund të dëmtohet kredibiliteti i institucioneve të drejtësisë,” deklaroi Osmanaj.
Ai komentoi gjithashtu edhe vendimin e Gjykatës Kushtetuese që urdhëron konstituimin e institucioneve brenda 30 ditësh. Sipas tij, vendimi ishte i domosdoshëm dhe i qartë, por problemi më i madh është polarizimi ekstrem politik në vend.
“Kjo përçarje e skajshme ka pasoja të jashtëzakonshme për demokracinë. Kemi krijuar dy taborë, pro dhe kundër, që po e minojnë funksionimin e shëndoshë institucional,” theksoi ai.
Osmanaj shprehu shqetësimin se në Kosovë çdo vendim i gjykatave po manipulohet dhe interpretohet për përfitime politike.
“Është fatkeqësi që çdo vendim gjyqësor po shfrytëzohet si mjet politik. Kjo minon drejtësinë dhe dëmton sistemin demokratik të vendit,” përfundoi Osmanaj.
