Njohësi i zhvillimeve politike, Egzon Osmanaj ka deklaruar se mos votimi i kandidatëve të Listës Serbe për nënkryetar të Kuvendit po ndodhë për shkak të marrëdhënieve që ka pasur LVV dhe partitë e tjera shqiptare me Listën Serbe që nga sulmi në Banjska në vitin 2023.
Sipas Osmanaj, anëtarët e Listës Serbe nuk janë distancuar për atë sulm në Banjska, i cili është udhëhequr nga nënkryetari i kësaj partie dhe prandaj siç tha Osmanaj janë acaruar marrëdhëniet.
Ndërkohë, Osmanaj thotë se partitë politike po i ikën përgjegjësisë së tyre për të marrë vendime brenda Kuvendit.
“Unë mendoj që kjo ka të bëjë me marrëdhëniet që kanë ekzistuar tash e dy vite karshi LVV por edhe partive tjera shqiptare me Listën Serbe pra qysh nga sulmi në Banjska në vitin 2023 e që ka qenë e udhëhequr nga nënkryetari i kësaj Liste si pasojë e kësaj pra me të drejtë janë acaruar marrëdhëniet me këtë formacion politik dhe ndoshta për më keq anëtarët e kësaj Liste nuk janë distancuar nga ai sulm i cili është udhëhequr po e theksoi prapë nga nënkryetari i tyre dhe normalisht nuk mund të presim sjellje të njëjtë… Deputetët nuk janë të detyruar të votojnë për askënd dhe në këtë kuptim deputetët e kanë ushtruar të drejtën e tyre të votës, kemi parti politike që e sabotojnë komplet procesin e votimit. Problemi është që partitë politike po i ikën përgjegjësisë së tyre për të marrë vendime brenda Kuvendit, nuk mund të ketë konstituim të Kuvendit përderisa partitë shmangen marrjes së përgjegjësisë”, ka deklaruar Osmanaj në emisionin “Ditari” në tëvë1./teve1.info/
