Disa njehsorë elektrikë u përfshin nga zjarri të dielën mbrëma në rrugën “Hyzri Talla” në Fushë Kosovë. E nga KEDS konfirmuan se ka ndodhur një incident i tillë. Derisa nga ana e zjarrfikësve thonë se të lënduar nuk ka.
Orët e rrymës janë bërë shkrumb e hi.
Kjo gjendje erdhi, pasi zjarri kaploi katër njehsorët elektrikë në katin e katërt të një objekti banesor në rrugën “Hyzri Talla” në Fushë Kosovë mbrëmjen e së dielës.
Në vendngjarje menjëherë u thirrën zjarrfikësit. Por ata, nuk u drejtuan saktësisht në adresë.
“Zjarrfikësit ekipi kujdestar menjëherë është nisë dhe ka dal në vendin e ngjarjës por këtu vlen të ceket se person i cili ka bo lajmërimin e zjarrfikësve nuk e ka dhanë adresën e qartë kështu që ka pasur vështirësi deri te gjetja e adresës. Zjarrfikësit rastësisht janë takuar edhe me patrullën e Policisë të cilët e kanë përcjell e janë shku në vendin e ngjarjes”, tha Abdusamed Shkodra- zëvendës komandat i brigadës së zjarrfikësve.
Menjëherë, janë evakuuar edhe banorët e objektit, të cilët shpëtuan pa lëndime.
“Më të mbërri në ora 22:08 minuta zjarrfikësit në vendin e ngjarjes menjëherë kanë intervenuar në fikjen e zjarrit dhe në evakuimin e qytetarëve të cilët kanë ngelë në banesë”, tha Shkodra.
Mirëpo shkaqet se si ka ardhur deri te kjo djegie ende janë të paqarta.
Megjithatë, nga KEDS- i shprehën të gatshëm të bëjnë instalimin e njehsorëve elektrikë kurdo që qytetarët të janë të gatshëm.
“Meqë këto janë asete private, banorët aty pasi t’i rregullojnë kabllot elektrike të dëmtuara, KEDS-i do të bëjë instalimin e njehsorëve elektrikë. Po ashtu, ju informojmë se ekipi përkatës i KEDS-it ka dalë në vend të ngjarjes, megjithatë aktualisht nuk dihen arsyet se si ka ardhur deri te djegia e këtyre njehsorëve elektrikë”, tha zëdhënësi Lulëzim Krasniqi.
Televizioni ka tentuar të marrë një qëndrim për këtë çështje edhe nga Policia e Kosovës, rajoni në Prishtinë por të njëjtit nuk janë përgjigjur.
Po ashtu, të paqashshëm ishin edhe qytetarët të cilët prapa kamerës thanë që janë të shqetësuar me krejt atë çfarë ndodhi mbrëmjen e së dielës.
Kronika e realizuar nga gazetarja Fëllënza Krasniqi.
