Profesori Avdi Smajljaj vlerëson se të gjitha opsionet për formimin e qeverisë së re janë të hapura përfshirë atë me Vetëvendosjen si parti fituese me ndonjë nga paritë opozitare, por edhe një qeveri të opozitës.
Ai ka thënë se më e rëndësishmja është se çfarë marrëveshje për qeverisje do të arrihet.
Smajljaj ka thënë se një opsion për formimin e qeverisë është i VV-së me pakicat dhe deputetët e Nismës. Opsioni tjetër sipas tij është, një koalicion i VV-së me LDK-në, PDK-në apo AAK-në.
Tjetër mundësi bashkëpunimi sipas tij mund të ndodhë ai i partive opozitare, nëse VV-ja nuk arrin ta formojë qeverinë.
“Fillimisht mund ta bëjë një qeveri të pakicave, Vetëvendosje me partitë e minoriteteve, nëse shkojnë edhe deputetët e Nismës. Mundësia tjetër është që VV ta bëjë koalicionin me LDK-në ose PDK-në,ose AAK.. Në rast se partia e parë nuk ja del që ta formojë qeverinë, partitë opozitare pasi që të shpenzohet mandati i nevojshëm për partinë e parë mund të përpiqen që ta bëjnë qeverinë”, ka thënë Smajljaj në emisionin “InfoNata” në Tëvë1.
Por, sipas tij asnjë nga këto koalicione nuk siguron stabilitet dhe zgjedhjen e presidentit të vendit nëse nuk ka marrëveshje.
Paralajmërimi i kryetarit të LDK-së për një mbledhje të kryesisë të hënën, sipas tij, mund të jetë mundësia që të diskutohet edhe për ndonjë koalicion.
