Përderisa pushteti është zotuar se do të ketë shkarkime nëse vërtetohet se ndonjë hallkë institucionale ka dështuar, opozita thotë se e ndjera ka vdekur në duart e shtetit.
Kryeministri Albin Kurti përmes një reagimi të dytë të enjten tha se shteti i ka më pak se 10 mijë policë për mëse 300 mijë familje, përderisa dhuna në familje është përhapur gjithandej.
“Pothuajse secili qytetar në Kosovë e din dhe njeh së paku një familje ku kishte apo ka dhunë. A e ka lajmëruar atë dhe sa është interesuar për të, është një çështje tjetër pastaj. Shumësia e dhunuesve nëpër familje e ka sjellur familjarizimin me dhunuesit në shoqëri. Kur vritet gruaja tashmë është bërë vonë. Zgjimi shoqëror edhe po ngjan vonë edhe po zgjat shkurt. Një a dy protesta të nesërmen, dhe: mirupafshim pas vrasjes së ardhshme”, ka thënë Kurti.
Me këtë reagim, sipas liderit të PDK-së, Memli Krasniqit, kryeministri ka fajësuar tërë shoqërinë për rritjen e dhunës në familje. Ai ka thënë se nuk pret dorëheqje nga Kurti e as nga ministrat e tij.
“Për të dhënë dorëheqje, duhet të kesh integritet, moral dhe etikë, të jesh i përgjegjshëm e profesional. Ju nuk keni këso profile në kabinetin tuaj. Keq, shumë keq”, ka thënë Krasniqi.
E Lumir Abdixhiku i LDK-së ka thënë se në rastin e gruas që u vra mbrëmë, ka rënë shteti në çdo drejtim dhe se Kurti nuk do drejtësi.
“Po të donte rend e ligj, nuk do ta linte shtetin pa Kryeprokuror tash e një vit e nuk do t’ia zbriste pagat gjithë sistemit të drejtësisë, për të shkaktuar kaos aty. Një sistem i tërë drejtësie është në greve; mbi 500 lëndë në ditë shtyhen si pasojë e kësaj përplasjeje të panevojshme”, ka thënë ai.
Kurse Ramush Haradinaj i AAK-së e ka quajtur Kurtin bashkëpjesëmarrës në krim.
“Burimi i së keqes e i krimit në këtë shtet e ka një shkak, e ka një burim dhe e ka një kokë! Një kryeministër që e defunksionalizon sistemin e drejtësisë në shtet duke i përgjysmuar pagat e gjyqtarëve e prokurorëve, që i poshtëron policët, i lë të leckosur e me paga mizerje, që i detyron mjekët ta braktisin punën e vendin”, ka thënë Haradinaj.
Vrasja e 35-vjeçares shtatzënë në oborrin e QKUK-së, ka ngritur në këmbë të gjithë masën, derisa familjarët e tashmë të ndjerës, deklaruan se ish-bashkëshorti i saj, e ka rrahur në vazhdimësi viktimën.
Kronika e realizuar nga Gojart Jashari
