Jo rrallëherë zyrtarët kosovarë shfaqin pakënaqësi ndaj Bashkimit Evropian.
Kritikat ndaj emisarëve të BE-së nuk kanë munguar edhe nga zëvendëskryeministri Besnik Bislimi.
Të njëjtit i ka quajtur të njëanshëm.
E ditë më parë, kundërshtoi edhe thirrjen që Brukseli ia bëri për të diskutuar për çështjen e dinarit.
E një gjë të tillë po e cilëson skandaloze deputetja e PDK-së, Ariana Musliu-Shoshi.
“Deklaratat e Besnik Bislimit janë mjaft skandaloze, është duke i bërë një shërbim Vuçiqit me këtë sjellje të tij, me këtë shantazh ndaj Bashkimit Evropian, me deeaskalim, eskalim. Nuk ka asnjë shans që Kosova si shtet e cila prosperon që të jetë anëtare të integrohet në Bashkimin Evropian të merret me shantazhe ndaj BE-së, ndaj emisarëve që janë të deleguar për t’u marrë me këtë punë” , ka deklaruar ajo.
E nga LDK-ja thonë se pavarësisht refuzimit, numri dy i Qeverisë do të shkojë në Bruksel.
“Në bazë të deklaratave të Besnik Bislimit unë nuk i besoj, sot thotë nuk shkoj mbas 1 muaji ose 2 jave prapë shkon. Mbetët të vendos ai, deklaratat të cilat i jep Besnik Bislimi janë të kota, si çdo herë ju e keni pa vet, asnjë parim prej që kanë ardhur në qeverisje nuk e kanë mbajtë edhe këtë besoj e ndërron shumë shpejtë”, ka thënë deputetja Rrezarta Krasniqi.
Por ndryshe mendon Besnik Tahiri i AAK-së.
“Nuk duhet të shkojë Bislmi në Bruksel, sepse ajo është çështje, është veprim i brendshëm, nuk diskutohen veprimet e brendshme. Problemi është se një çështje, që është veprim i Institucioneve të Kosovës, këta e bëjnë temë për me u diskutu në Bruksel sepse nuk dinë, nuk donë, në fakt janë të papjekur dhe në fund tërhiqen. Këto po shkaktojnë dëm sidomos para anëtarësimit të Kosovës në KiE dhe në NATO” , ka pohuar ai.
E nga partia në pushtet vlerësojnë se dinari nuk duhet të kthehet në çështjen e dialogut.
“Tashmë çështja e dinarit është proces i përfunduar dhe në këtë kuptim, mendojmë se dinari nuk duhet të jetë temë në tryezën e dialogut mes Kosovës dhe Serbisë sepse tashmë në gjithë Evropën valutë zyrtare është euroja”, ka thënë Arber Rexha.
Bashkimi Evropian ditë më parë thirri në takim kryenegociatorin Besnik Bislimi në Bruksel për të diskutuar rreth mundësisë për shtyrjen e vendimit të dinarit, por i njëjti e refuzoi ftesën.
