Mbledhja u thirr për të premten.
Kësaj radhe, Kryesia e Kuvendit kishte kuorum për vendosjen e seancës së ardhshme.
Pas mbledhjes, grupet parlamentare dolën në konferencë për media.
Aty, shefja e grupit parlamentar të LVV-së, Mimoza Kusari-Lila, njoftoi rreth dakordimeve që patën.
“U dakordua që seancë e rregullt plenare të mbahet më 7 mars të enjten me fillim nga ora 10:00, me një rend të ditës pjesë e së cilës janë pikat e rregullta, deklarimet jashtë rendit të ditës, pyetjet parlamentare, 11 marrëveshje ndërkombëtare janë në rend të ditës për të enjten me 7 mars. Kuvendi do ta ketë edhe një seancë të veçantë e cila mbahet të martën më 5 mars, me fillim në ora 10:00, e cila shënon përvjetorin e Epopesë së Ushtrisë Çlirimtare të Kosovës”, tha ajo.
Ndërsa partitë opozitare kërkuan të ketë edhe propozime jashtë rendit të ditës.
“Këtë seancë të enjten do të jetë në votim Komisioni Hetimor për rastin Dehari për humbjen e mostrave të rastit Dehari kjo është një çështje shumë e rëndësishme. E ftoj Lëvizjen Vetëvendosje, partnerët e komunitetit jo shumicë që ta votojnë këtë komision hetimor”, tha Abelard Tahiri.
E Aleanca për Ardhmërinë e Kosovës, përveç ligjit për sigurimet shëndetësore, kërkuan që në Kuvend të sillet edhe Amandamenti i ligjit të pagave.
“ Si Aleancë do i mbështesim marrëveshjet ndërkombëtare, derisa kemi kërkesë eksplicite që të ketë reflektim mbi dy kërkesat tona, kryesore, e para është e para lidhet me seancën e djeshme me debatin e jashtëzakonshëm rreth sigurimeve shëndetësore që të na votohet rezoluta, dhe që lidhet me sigurimet shëndetësore që të vije në kuvend në maj që të përfundoj para korrikut dhe poashtu amendamentin për ligjin e pagave”, u shpreh Besnik Tahiri.
Në seancën e 7 marsit, pritet votimi për zgjedhjen e anëtarëve të Këshillit Prokurorial të Kosovës, një anëtar nga Shoqëria Civile dhe zgjedhjen e katër anëtarëve për bordin e Radio Kosovës.
