Në diskutimet e 26 tetorit me liderët evropian, kryeministri Albin Kurti e ka pranuar propozimin për Asociacionin që ia sollën pesë emisarët më 21 tetor.
Deri më tani vetëm ekzekutivi ka pasur qasje në këtë draft, pasi nga Qeveria thonë se është kërkesë e ndërmjetësuesve që ky dokument të mbetet konfidencial.
Por, kryeministri Kurti përmbajtjen e draftit të Asociacionit e ka diskutuar këto ditë me deputetët e grupit parlamentar të Vetëvendosjes.
Deputetja e Vetëvendosjes, Fjolla Ujkani tregon për detajet e takimit që kanë pasur me shefin e tyre.
“Në mbledhjen e fundit të grupit parlamentare ka qenë prezent edhe kryeministri Albin Kurti, i cili ka shpalosur detaje lidhur me draft statutin por ja që nuk kemi arritur që ta kemi të detajizuar draft-statutin … është mirë që kemi arritur ta shpiem deri në vet-menaxhim, pra që nuk bije ndesh kushtetutshmërinë e Republikës së Kosovës dhe nuk është një asociacion me kompetenca ekzekutive, pra kjo duhet të jetë e rëndësishmja”, tha Ujkani.
Ndërsa, deputetja e opozitës nga Partia Demokratike e Kosovës, Ganimete Musliu, thotë se Kurti e ka obligim kushtetues t’i njoftoj të gjithë deputetët për draftin.
“Qytetarët e Republikës së Kosovës e meritojnë të dijnë se çka është duke ndodhur në Bruksel me dialogun. Duke pasur parasysh që është fol shumë, duke pasur parasysh që është dramatizu shumë, unë mendoj që qytetarëve të Republikës së Kosovës, ua kemi borxh transparencën dhe sqarimet. Por, mbi të gjitha Albin Kurti ia ka borxh Kuvendit të Republikës së Kosovës dhe është i obliguar me Kushtetutë dhe ligj që të jetë transparent nga Kuvendit të Republikës së Kosovës”, tha Musliu.
Për takimet e fundit në Bruksel në kuadër të dialogut Kosovë – Serbi, kryeministri Albin Kurti të premten do të raportoj para Kuvendit të Kosovës.
