Opozita e qendrës së djathtë të Grenlandës ka arritur një fitore të papritur në zgjedhjet e përgjithshme – në një votim që dominohej nga tema e pavarësisë dhe deklaratat dhe zotimet e presidentit amerikan, Donald Trump për të marrë nën kontroll territorin gjysmë autonom.
Partia e qendrës së djathtë, Demokraatit – e cila favorizon një qasje graduale ndaj pavarësisë nga Danimarka – arriti rreth 30% të votave, tregojnë rezultatet pothuajse të plota, raporton BBC.
“Grenlanda ka nevojë që ne të qëndrojmë së bashku në një kohë me interes të madh nga jashtë,” tha kreu i partisë Jens Frederik Nielsen për mediat lokale. “Ka nevojë për unitet, ndaj do të hyjmë në negociata me të gjithë.
Presidenti amerikan, Donald Trump është shprehur hapur për dëshirën e tij për të kontrolluar Grenlandën, duke thënë në një seancë të përbashkët të Kongresit javën e kaluar se ai mendonte se SHBA do ta arrinte atë “në një mënyrë ose në një tjetër”.
Ajo ka tërhequr vëmendjen e Trump pasi vendi ka depozita të pasura të mineraleve të rralla të tokës të nevojshme për të prodhuar gjithçka, nga telefonat celularë deri te teknologjia e energjisë së rinovueshme.
Grenlanda – ishulli më i madh në botë, midis Oqeanit Arktik dhe Atlantik – është kontrolluar nga Danimarka, gati 3,000 km (1,860 milje) larg, për rreth 300 vjet.
Grenlanda i drejton punët e saj të brendshme, por vendimet për politikën e jashtme dhe të mbrojtjes merren në Kopenhagë.
