Omani ka njoftuar se përpjekjet ndërmjetësuese të tij çuan në një armëpushim midis SHBA-së dhe grupit Houthi të Jemenit, pasi presidenti i SHBA-së, Donald Trump, tha se grupi nuk do të kryejë sulme ndaj anijeve tregtare, transmeton Anadolu.
“Pas diskutimeve dhe kontakteve të fundit të kryera nga Sulltanati i Omanit me SHBA-në dhe autoritetet përkatëse në Sana, në Republikën e Jemenit, me qëllim të de-përshkallëzimit, përpjekjet kanë rezultuar në një marrëveshje armëpushimi midis dy palëve”, shkroi në rrjetet sociale Badr Albusaidi, ministër i Puënve të Jashtme i Omanit.
“Në të ardhmen, asnjëra palë nuk do të synojë tjetrën, përfshirë anijet amerikane, në Detin e Kuq dhe Ngushticën Bab al-Mandab, duke siguruar lirinë e lundrimit dhe rrjedhën e qetë të trasportit ndërkombëtar tregtar”, shtoi ai.
Duke shprehur vlerësim për bashkëpunimin e të dyja palëve, Albusaidi tha se, “Sulltanati i Omanit shpreh mirënjohjen e tij ndaj të dyja palëve për qasjen e tyre konstruktive që çoi në këtë rezultat të mirëpritur dhe shpreson se kjo do të çojë në përparim të mëtejshëm në shumë çështje rajonale drejt arritjes së drejtësisë, paqes dhe prosperitetit për të gjithë”.
Grupi Houthi filloi të sulmojë rrugët detare në Detin e Kuq dhe Detin Arabik pas luftës së Izraelit në Gaza, në solidaritet me palestinezët.
Në muajin mars, Trump nisi një operacion ushtarak kundër grupit jemenas.
Më herët, gjatë një takimi në Shtëpinë e Bardhë me kryeministrin kanadez, Mark Carney, Trump tha se grupi Houthi njoftuan se nuk do të kryejnë sulme të tjera ndaj anijeve tregtare dhe se SHBA-ja do të kundërpërgjigjen duke ndaluar sulmet ndaj Jemenit.
