Skuadra e Olympiacosit ka kompletuar setin final të Ligës së Konfrencës.
Në finalen e kësaj gare që është e treta në nivelin e UEFA-s, Olympiacosi do të përballet me Fiorentinën.
Olympiacosi finalen e siguroi të enjten mbrëma, pasi edhe në ndeshjen e dytë gjysmëfinale e mposhti Aston Villan.
Në ndeshjen e luajtur në Greqi, Olympiacosi triumfoi me rezultatin 2:0, ku të dy golat i shënoi sulmuesi Ayoub El Kabbi.
Kështu, Olympiacosi avancoi në finale të Ligës së Konferencës me rezultatin e përgjithshëm 6:2, pasi në ndeshjen e parë të luajtur në Angli, ekipi grek kishte mposhtur 4:2 Aston Villan.
Për dallim prej Olympiacosit, Fiorentina avancoi në finale të mërkurën mbrëma pasi në gjysmëfinale e eliminoi Club Bruggen me rezultatin e përgjithshëm 4:3.
Ky është edicioni i tretë i Ligës së Konferencës, ndërsa finalja e këtij viti do të mbahet në Athinë më datën 29 maj.
