Michael Fakhri, raportuesi special i OKB-së për të drejtën e ushqimit, thotë se “Shtetet e Bashkuara janë bashkëpunëtore në “vrasjen e civilëve” në Gaza, ku aleati i saj kryesor në Lindjen e Mesme, Izraeli, po kryen një “fushatë urie” të deklaruar publikisht.
“Le të shohim se kush kontrollon kufijtë. Kush kontrollon fluksin e mallrave dhe ndihmave humanitare. Kush kontrollon gjithçka që hyn dhe del nga Gaza. Është Izraeli,” tha Fakhri, për Al Jazeera.
Kurse në një deklaratë të premten, Programi Botëror i Ushqimit i OKB-së (WFP) konfirmoi se kishte “dorëzuar rezervat e fundit të mbetura ushqimore” në Gaza në kuzhinat lokale, të cilat parashikon se do të mbarojnë plotësisht ushqimin “në ditët e ardhshme”.
Që nga 2 marsi, Izraeli ka bllokuar plotësisht të gjitha furnizimet me ndihma, përfshirë ushqimin, ilaçet dhe karburantin nga hyrja në Gaza, duke kundërshtuar një urdhër të Gjykatës Botërore të vitit 2024 për të lehtësuar hyrjen e ndihmës humanitare.
Në ndërkohë, Mahmoud Basal, zëdhënës i Mbrojtjes Civile Palestineze në Gaza, tha se mungesa e pajisjeve të shpëtimit i ka penguar punonjësit e urgjencës të arrijnë më shumë se 30 persona që besohet se janë nën rrënojat e një shtëpie të bombarduar nga Izraeli para agimit.
Katër persona u vranë në atë sulm në shtëpinë e familjes Khour në lagjen Sabra të qytetit të Gazës dhe pesë u plagosën, tha Basal.
“Ekuipazhet tona nuk mund t’i arrijnë për shkak të mungesës së makinerive të nevojshme,” i tha ai agjencisë së lajmeve AFP.
Kujtojme se, së fundmi avionët izraelitë shkatërruan 40 automjete inxhinierike të mërkurën në Gaza që mbrojtja civile tha se ishin përdorur për heqjen e mbeturinave të rënda në operacionet e kërkimit dhe shpëtimit dhe për të hequr trupat e të vdekurve nga ndërtesat e shumta të shkatërruara të Rripit.
