Duke folur në një konferencë shtypi në Kopenhagë, kryeqyteti i Danimarkës, raportuesja speciale e OKB-së për territorin e pushtuar palestinez, Francesca Albanese , të mërkurën tha se “Propozimi i presidentit amerikan Donald Trump për të zhvendosur palestinezët nga Gaza në vende të tjera dhe për të vendosur enklavën palestineze nën kontrollin e SHBA-së është “i paligjshëm, imoral dhe krejtësisht i papërgjegjshëm”
Ajo dënoi propozimin dhe paralajmëroi se ai do të përkeqësonte krizën rajonale.
“Është nxitje për të kryer zhvendosje të detyruar, që është një krim ndërkombëtar,” shtoi ajo.
Albanese i kërkoi komunitetit ndërkombëtar të mbajë një qëndrim më të fortë, duke thënë: “Komuniteti ndërkombëtar përbëhet nga 193 shtete dhe kjo është koha për t’i dhënë SHBA-së atë që ka kërkuar – izolimin”, tha ajo.
Albanese hodhi poshtë nocionin se stimujt ekonomikë mund të zgjidhin konfliktin e gjatë në Lindjen e Mesme.
“Për një kohë të gjatë, komuniteti ndërkombëtar e ka trajtuar çështjen e Palestinës si diçka që mund të menaxhohet përmes zhvillimit, stimujve ekonomikë dhe ndihmës humanitare,” tha ajo. “Sinqerisht, nuk funksionon.”
“E vetmja mënyrë për të ndaluar dhunën është t’i japim paqes një shans nëpërmjet lirisë”, theksoi Albanese.
Gjatë një konference për shtyp me kryeministrin izraelit Benjamin Netanyahu në Uashington të martën, Trump tha se SHBA “do të marrë kontrollin” e Gazës pas zhvendosjes së palestinezëve gjetkë sipas një plani rizhvillimi që ai pretendonte se mund ta kthente enklavën në “rivierën e Lindjes së Mesme”.
Turqia, Jordania dhe Egjipti, si dhe vende të tjera rajonale dhe evropiane, duke përfshirë Britaninë e Madhe, Francën dhe Gjermaninë, kanë refuzuar propozimin e zhvendosjes së Trump.
