Zyra e OKB-së për të drejtat e njeriut i ka kërkuar Izraelit të sigurojë llogaridhënie pas sulmeve të përsëritura vdekjeprurëse ndaj gazetarëve dhe spitaleve në Gaza.
Zëdhënësi i Zyrës së OKB-së për të Drejtat e Njeriut, Thameen Al-Kheetan, u tha gazetarëve në Gjenevë të martën se, ndërsa autoritetet izraelite kanë njoftuar hetime për incidente të tilla, asnjë nuk është përfunduar.
“Ne kërkojmë përgjegjësi dhe drejtësi”, tha ai, citon Anadolu.
Al-Kheetan dënoi sulmin e ushtrisë izraelite në Spitalin Nasser në qytetin jugor të Khan Younis të enjten, në të cilin u vranë edhe pesë gazetarë.
“Ne kemi qenë dëshmitarë dhe dokumentuar shumë sulme të papranueshme kundër gazetarëve. Që nga 7 tetori 2023, të paktën 247 gazetarë palestinezë janë vrarë në Gaza. Këta gazetarë janë sytë dhe veshët e të gjithë botës dhe duhet të mbrohen”, tha ai.
Zëdhënësi tha se vrasjet ngritën pyetje serioze në lidhje me shënjestrimin e gazetarëve dhe theksoi se të gjitha incidentet e tilla duhet të hetohen.
Ai theksoi gjithashtu se spitalet, ashtu si gazetarët, janë të mbrojtura sipas ligjit ndërkombëtar.
“Autoritetet izraelite në të kaluarën kanë njoftuar se kanë nisur hetime për vdekje të tilla. Sigurisht, si fuqi pushtuese, është përgjegjësi e Izraelit të kryejë hetime, por këto hetime duhet të përfundojnë dhe drejtësia duhet të vihet në vend. Deri më tani, nuk kemi parë asnjë rezultat apo masa llogaridhënieje. Ne po bëjmë thirrje për llogaridhënie dhe drejtësi”, shtoi ai.
Izraeli ka vrarë gati 63,000 palestinezë në Gaza që nga tetori i vitit 2023. Fushata ushtarake ka shkatërruar enklavën, e cila po përballet me urinë.
