Kombet e Bashkuara kanë njoftuar se do të zvogëlojnë ekipin e saj ndërkombëtar në terren në Gaza, pas rifillimit të sulmeve izraelite, që kanë vrarë qindra njerëz, në mesin e tyre edhe personel të OKB-së.
Zëdhënësi i OKB-së Stephan Dujarric, ka thënë në një konference shtypi të hënën se 30 nga 100 sa ishte stafi ndërkombëtar i saj do të largohen nga Gaza këtë javë, raporton AP.
Dujarric tha se “masa e përkohshme” ishte një “vendim i vështirë” i marrë nga Sekretari i Përgjithshëm i OKB-së Antonio Guterres për arsye sigurie dhe operacionale.
Zëdhënësi i OKB-së konfirmoi gjithashtu se një tank izraelit ishte përgjegjës për sulmin në një kompleks të OKB-së në Deir el-Balah, Gaza qendrore, më 19 mars, që vrau një anëtar të stafit bullgar të OKB-së dhe la gjashtë punonjës të tjerë të huaj me lëndime të rënda.
Deklarata e Dujarric ishte e para e OKB-së që implikoi forcat izraelite në sulmin në vendin e shënuar qartë të OKB-së. Kjo vjen pasi ushtria izraelite mohoi në mënyrë të përsëritur se ishte përgjegjëse për sulmin, i cili erdhi një ditë pasi Izraeli theu marrëveshjen e armëpushimit me Hamasin pas vetëm dy muajsh paqeje relative.
Mbi 250 nga stafi i tyre janë vrarë në 15 muajt e fundit apo më shumë, por tani, Sekretari i Përgjithshëm po thotë se situata është aq e rrezikshme sa nga 100 personeli ndërkombëtar në Gaza të punësuar nga OKB-ja, ai do ta zvogëlojë atë staf me rreth një të tretën, ose rreth 30 nga ata personel ndërkombëtar, të cilët do të largohen nga Gaza për sigurinë e tyre.
Që nga 7 tetori 2023, lufta e Izraelit në Gaza ka vrarë më shumë se 50,000 palestinezë dhe ka plagosur rreth 113,200 të tjerë në territor, ka thënë Ministria e Shëndetësisë së Gazës.
