Izraeli ka kryer “akte gjenocidale” kundër palestinezëve, duke shkatërruar në mënyrë sistematike objektet e kujdesit shëndetësor të grave gjatë luftës së tij në Gaza dhe duke përdorur dhunën seksuale si një strategji lufte, kanë thënë ekspertët e Kombeve të Bashkuara.
Të enjten, Komisioni i Pavarur Ndërkombëtar i Hetimit me bazë në Gjenevë tha në një raport të ri se Izraeli “sulmoi dhe shkatërroi qëllimisht” qendrën kryesore të fertilitetit të Gazës, ndërsa në të njëjtën kohë bllokoi hyrjen e ilaçeve për shtatzënitë, lindjet dhe kujdesin neonatal në enklavë, raporton Anadoly.
Raporti thekson forma të ndryshme abuzimi, duke përfshirë zhveshjen e detyruar publike, ngacmimin seksual, kërcënimet për përdhunim dhe sulmet seksuale, të cilat i përshkruan si pjesë të procedurave standarde operative të forcave izraelite të sigurisë.
Shkelje më të rënda, të tilla si përdhunimi dhe dhuna në organet gjenitale, u kryen ose me urdhër të qartë ose me inkurajim të nënkuptuar nga udhëheqja e lartë civile dhe ushtarake e Izraelit, pretendon raporti.
Raporti argumentoi se Izraeli ka “shkatërruar pjesërisht kapacitetin riprodhues të palestinezëve në Gaza si grup”, të cilin ai i klasifikon si akte gjenocidale sipas Statutit të Romës dhe Konventës së Gjenocidit.
Gratë dhe vajzat, duke përfshirë pacientët e lindjes, kanë qenë ndër ata që janë shënjestruar drejtpërdrejt, akte për të cilat komisioni tha se përbëjnë “krim kundër njerëzimit dhe krim lufte të vrasjes me dashje”.
Gjetjet u prezantuan së bashku me dy ditë dëgjimesh publike në Gjenevë më 11-12 mars, ku viktimat, dëshmitarët dhe personeli mjekësor dhanë dëshmi.
Navi Pillay, kryetar i komisionit theksoi nevojën për llogaridhënie, duke bërë thirrje për ndjekjen penale të autorëve përmes Gjykatës Penale Ndërkombëtare dhe gjykatave kombëtare nën juridiksionin universal.
