Fillimisht ishte kryeministri i vendit, Albin Kurti, që akuzoi ndërmjetësuesin për dialog Miroslav Lajçak, se është pozicionuar kundër Kosovës në dialog.
E i pakënaqur me qasjen e diplomatit sllovak në dialog, po shprehet edhe vartësi i Kurtit, Besnik Bislimi.
Madje, kryenegociatorit kosovar në dialog nuk i pëlqeu fakti, që ndërmjetësi Lajçak u takua me OJQ-te serbe në Bruksel.
Sipas Bislimit, këto OJQ serbe janë kundër integrimit të qytetarëve serbë në jetën ekonomike dhe sociale të Kosovës.
Nga këto komente të zëvendëskryeministrit,Besnik Bislimi, mbeti befasuar drejtori i organizatës AKTIV, Miodrag Miliçeviq, i cili ishte prezent në atë takim me diplomatin evropian.
“Të jem i sinqertë me ju kur e pash atë shkrim të z.Besnik Bislimi u befasova shumë, siç u befasuan edhe të tjerët që ishin në atë takim. Konsideroj se kjo nuk është gjuha e duhur për të komunikuar nga z.Bislimi, i cili bart poste të rëndësishme publike. Disa përfaqësues të Kosovës nuk po i kuptojnë marrëveshjet në kuadër të dialogut, siç janë marrëveshjet për integrimin e komunitetit serb, kjo është përgjegjësi e palës kosovare. Unë nuk jam politikan, unë i takoj shoqërisë civile dhe detyra ime është t’i mbaj përgjegjës udhëheqësit politik për punën që ata e bëjnë. Unë besoj se edhe z.Bislimi e di që ka bërë gabim me atë status, sepse unë kam zhvilluar takime disa herë me te gjatë këtyre viteve, dhe tani ai po sulmon organizatat më të moderuara të shoqërisë civile. Natyrisht qe ne dëshirojmë dhe përkushtohemi që të jemi sa më të integruar brenda sistemit të Kosovës”, tha ai.
Kritike për qasjen e Bislimit po shprehet edhe Jovana Radosavljeviq, nga Iniciativa e Re Sociale.
Ajo tregon për tëvë1 se çfarë u diskutua brenda dyerve të mbyllura në Bruksel.
“Ne aty ishim si pjesëtar të shoqërisë civile për të diskutuar për kapitullin 35 që ndërlidhet me dialogun mes Kosovës dhe Serbisë. Unë dhe organizata funksionojmë në veriun e Kosovës andaj komunikimi për këto çështje është shumë i rëndësishëm. Ne edhe më herët e kemi ngritur si shqetësim mungesën e transparencës në dialog edhe këto i kemi bërë të qarta në Bruksel, para ndërmjetësuesit Lajçak. Për mua është shqetësuese mënyra se si reagoi z.Bislimi në platformën X, kjo nuk është gjuha e duhur për t’iu përgjigjur kritikave. Ne nuk punojmë kundër integrimit të serbëve në Kosovë, është krejtësisht e kundërta sepse ju mund ta shihni punën që e bëjmë, është transparente për të gjithë. Ne jemi një organizate multi-etnike që punojmë për të krijuar një mjedis sa ma të mirë dhe të barabartë për të gjitha komunitetet”, shprehet Radosavljeviq.
Edhe Konventa Kombëtare e Bashkimit Evropian (NCEU) i ka reaguar zëvendëskryeministrit Besnik Bislimi, për akuzat ndaj emisarit Miroslav Lajçak duke konsideruar që sjellja e tij duhet të dënohet nga Qeveria e Kosovës, Bashkimi Evropian dhe shtetet anëtare të QUINT-i
Pjesëtarët e shoqërisë civile në veriun e Kosovës po kërkojnë më shumë dialog te brendshëm më kryeministrin kosovar, Albin Kurti.
Sipas tyre, kryeministri i vendit nuk është treguar shumë i hapur me ta për të folur për rrjedhën e procesit të dialogut me Serbinë.
Kurse nga qeveria kanë deklaruar disa herë se janë duke bërë dialog me serbët por jo publikisht, me qëllim mbrojtjen e tyre nga presionet dhe kërcënimet e strukturave ilegale.
