Pesëmbëdhjetë organizata joqeveritare kanë reaguar ndaj vendimit të Qeverisë në detyrë për miratimin e Projektbuxhetit 2026, duke e konsideruar atë në kundërshtim me kërkesat ligjore të përcaktuara në Ligjin e Qeverisë dhe Kushtetutë. Sipas OJQ-ve, problemi qëndron te faktin se projektbuxheti është votuar nga persona që janë të certifikuar si deputetë.
Në reagimin e tyre, OJQ-të kanë theksuar:
“Projektligji për Buxhetin e Republikës së Kosovës për vitin 2026 mund të propozohej nga Qeveria në detyrë, në përputhje me Ligjin për Qeverinë. Megjithatë, siç kemi theksuar dhe në Letrën e dërguar, ky proces do duhej të zhvillohet në pajtueshmëri të plotë me Kushtetutën, ligjin dhe aktgjykimin e Gjykatës Supreme. Të njëjtat përcaktojnë qartë se një person nuk mund të ushtrojë njëkohësisht dy funksione, si anëtar i Qeverisë dhe si deputet.”
Sipas tyre, çdo veprim që shkel ligjin dhe Kushtetutën cenon vlefshmërinë e Ligjit për Buxhetin. OJQ-të vënë në dukje se mënyra se si u aplikua projekti i buxhetit nga Qeveria shkel në thelb normat kushtetuese dhe legjislative:
“Në këtë fazë të ndjeshme politike, respektimi i rendit kushtetues dhe vendimeve gjyqësore është thelbësor për të ruajtur stabilitetin institucional dhe për të garantuar që procesi i miratimit të buxhetit mbetet i ligjshëm. Çdo tentativë si kjo e sotmja për të anashkaluar ligjin e Qeverisë, aktgjykimin e Gjykatës Supreme dhe Kushtetutën e Republikës së Kosovës dëmton jo vetëm procesin e miratimit të buxhetit, por edhe vet parimin e sundimit të ligjit në Kosovë.”
Po ashtu, OJQ-të kritikojnë mënyrën e përgatitjes së projektligjit dhe pakove përkatëse:
“Vërehet se janë përgatitur pa një qasje gjithëpërfshirëse institucionale, duke e thelluar edhe më tutje krizën politike në vend dhe përfundimisht mosmiratimin e tij përmes konsensusit të përbashkët mes të gjitha partive politike. Një qasje e tillë cenon rëndë parimet e demokracisë së këtij vendi sepse po bëhet në periudhën e zgjedhjeve komunale dhe paralajmërimit edhe të zgjedhjeve të përgjithshme.”
