Oda Ekonomike Amerikane në Kosovë, i ka bërë thirrje Qeverisë së Kosovës që të heq masat që kufizojnë importet nga Serbia.
Sipas një komunikate të lëshuar nga OEAK, ndalimi i hyrjes së mallrave nga Serbia për në Kosovë, ka ndikuar edhe të kompanitë ndërkombëtare përfshirë edhe ato amerikane.
“Sipas të dhënave zyrtare të shqyrtuara nga Oda Amerikane, importet nga kompanitë me pronësi të konsiderueshme amerikane kanë rënë me mbi 39% krahasuar me vitin 2022, duke theksuar ndikimin e konsiderueshëm që masat aktuale të Qeverisë së Kosovës kanë mbi ndërmarrjet ndërkombëtare. Ndalimi, i cili synon Serbinë dhe produktet e importuara nga ky shtet, në fakt ndikojnë në masë të madhe në kompanitë ndërkombëtare. Shumë prej këtyre bizneseve, janë në pronësi të kompanive nga shtetet partnere, përfshirë Shtetet e Bashkuara të Amerikës, të cilat kanë qenë shtylla kyçe në mbështetjen e trajektores së rritjes së Kosovës”, thuhet në komunikatën e tyre.
Sipas kësaj ode ky vendim i Qeverisë ka ndikuar edhe në rritjen e çmimeve
“Të dhënat zbulojnë një realitet të zymtë; importet e lidhura me kompanitë amerikane po pakësohen me një ritëm alarmues. Për më tepër, çdo pengesë për tregtinë, si ky ndalim, ka ndikuar pashmangshëm në rritjen e çmimeve të konsumit, duke rënduar më tej buxhetet e familjeve të Kosovës. Aq më tepër, në rrethana kur Kosova tashmë ka hequr ndalesën për importin e lëndëve të para dhe produkteve gjysmëfinale nga Serbia, është e pakuptimtë dhe ironike që të mbahet në fuqi masa e cila ndalon importin e malrrave që përbëjnë interesa komerciale ndërkombëtare”, thuhet tutje.
Oda Amerikane thotë se ka mbajtur vazhdimisht qëndrime të ngjashme në të kaluarën sa herë që janë vendosur barriera në tregti nga Kosova ndaj importeve nga vendet fqinje./teve1.info/
