Kanë mbetur edhe disa javë kur shkollat do të hapin dyert për nxënësit të cilët do të regjistrohen në klasë të parë.
E në mesin e dokumenteve të cilat duhet të dorëzohen, prindërit duhet të sjellin edhe vërtetim për vaksinim.
Kjo pasi me vendim të Ministrisë së Shëndetësisë, nxënësit duhet të vaksinohen paraprakisht, në të kundërtën ata nuk mund të regjistrohen.
Sekretari i shkollës “Daut Bogujeci” në Fushë Kosovë, Betim Ahmeti ka treguar se kanë hasur vështirësi në implementimin e këtij vendimi.
“Deri në vitin 2023/2024 vaksinimi ka ndodhur nëpër shkolla. Mirëpo duke e parë që është më e shëndetshme Ministria në bashkëpunim me Ministrin e Shëndetësisë e kanë arritur një momerandum bashkëpunim që paraprakisht nxënësit e klasës së parë të vaksinohen. Implementimi i tij fillimisht i tij në vitin 2023/2024 ka qenë me probleme por jo që nuk kanë qenë të zgjidhura .Kështu që vetëdijesimi i qytetarëve është arritur dhe po shpresoj që tani do të kemi më të lehtë shumë”, thotë ai.
E sipas drejtorit të shkollës “Selman Riza”, Esad Simnica i vetmi problem ka qenë mungesa e informacioneve.
“Ka shkuar puna mirë më thënë të drejtën vetëm një fëmijë me telashe, që na ka dashtë më filluar mësimin dhe nuk ka qenë i vaksinum për shkak të një problemi shëndetësor te tjerët nuk kemi pas problemi. Ka qenë një mos informim i duhur në kohë reale edhe pse janë disa prindër që për arsye të neglizhencës nuk kanë qenë të informuar”, thotë ai.
Ministria e Shëndetësisë në maj të vitit 2024 kishte bërë publike qarkoren informative përmes së cilës obligonte prindërit të vaksinojnë fëmijët para regjistrimit në klasë të parë.
