Nxënësit e shkollës fillore ‘’Vëllezrit Frashëri’’ të komunës së Lipjanit janë bërë pjesë e finales së garës ndërkombëtare të robotikës në SHBA. Ata do të përfaqësojnë Kosovën me katër projekte të kësaj natyre, mirëpo pjesëmarrja e tyre është në pikëpyetje, kjo për shkak të mungesës së mbështetjes financiare nga institucionet.
Projekti i qytetit solar po realizohet në miniaturë. Por ky është vetëm njëri nga katër projektet që nxënësit e shkollës ‘’Vëllezrit Frashëri’’ të komunës së Lipjanit do ta përfaqësojnë Kosovën në Olimpiadën e Gjenive në Amerikë.
“Tri projekte janë robotikë, një projekt është i shkencave. Edhe si ide është interesant, me prodhu rrymë prej paneleve diellore…”, tha Hajriz Radhiti – mësimdhënës i teknologjisë
E pavarësisht kushteve për punë, përgatitjet për këto projekte kanë filluar qysh vitin e kaluar. Mirëpo mungesa e përkrahjes financiare po i brengos edhe vet nxënësit pjesëmarrës.
“Kemi bërë punë praktike me robotë dhe i kemi punu në formën më të mirë që të prezantohemi sa më mirë në Olimpiadën e Gjenive. Në kuadër të përgatitjeve që i kemi bo, ne gjithmonë presim sukses, mirëpo do të ishte shumë mirë që ne mos ta kishim brengë punën e përkrahjes financiare por që të brengoseshim vetëm për pjesën e përgatitjes sa më të lartë”, Arnisa Miftari – nxënëse
Kërkesë për t’ju dalë në ndihmë ka bërë drejtori i kësaj shkolle, Jakup Bahtiri.
Ndërsa Drejtoria e Arsimit në këtë komunë kërkon nga institucionet qendrore bashkëfinancim për këtë aktivitet.
Shkolla ‘’Vëllezrit Frashëri’’ ka përfaqësuar disa herë Kosovën me pjesëmarrje në garat ndërkombëtare në fushën e shkencës dhe teknologjisë, duke u shpërblyer edhe me vendet e para.
