14 nxënës nga shkolla “Skëndërbeu” në Drenas, për një javë do të jenë përkrahë nxënësve nga Gjermania, Zvicra, Polonia, Hungaria, Letonia, Ukrainë, Turqia dhe Kroacia.
Për herë të parë, Kosova do të përfaqësohet në forumin rinor në Zvicër, ku edhe është vendi i vetëm pjesëmarrës nga Ballkani.
“Mund të jetë sfiduese, duke marrë parasysh se është hera e parë që marrim pjesë jashtë shtetit tonë. Por që, pavarësisht jam e sigurt që secili prej neve këtu mund t’ia dalim”, ka deklaruar Tringa Binaku-nxënëse.
Forumi ka si qëllim shkëmbimet ndërkulturore, duke u fokusuar në tri shtylla, politikë, të drejta të njeriut dhe ambient.
“Unë jam përcaktuar për pikën e të drejtave të njeriut, gjithmonë kam qenë i interesuar për të drejtat e njeriut në gjithë botën. Për arsye se ka shumë të drejta njerëzore që shkelen çdo ditë. Dhe së bashku me nxënësit e shteteve të tjera, shpresoj të arrijmë në përfundim që mos të ketë shkelje të të drejtave të njeriut”, tha nxënësi, Erjon Kastrati.
I gjithë organizimi do të mbahet në gjuhën angleze, për çka rrjedhshmëria e kësaj gjuhë ka qenë kriter kyç në përzgjedhjen e nxënësve dhe shtetit në përgjithësi.
“Pritshmëria e parë për ne nxënësit është përmirësimi i gjuhës angelze, po ashtu edhe për ngritjen e sjelljeve tona sociale me moshatarët tanë prej shteteve tjera”, ka deklaruar Erleta Binaku-nxënëse.
E përcjellja e njohurive të fituara gjatë qëndrimit në Zvicër tek nxënësit e tjerë në Kosovë, është pjesë e vazhdimësisë së forumit rinor.
“Ky forum është shumë i rëndësishëm për nxënësit tanë, i cili do të ndikojë në zhvillimin e tyre personal dhe akademik në të ardhmen. Natyrisht, njohuritë të cilat do t’i marrin atje, nxënësit do t’i zbatojnë këtu në Kosovë. Është edhe faza e fundit, pjesa e monitorimit, nëse nxënësit po i implementojnë ato njohuri që i kanë marrë gjatë këtij forumi”, ka deklaruar profesori, Nuhi Nika.
Si e rëndësishme edhe për vet nxënësit, shihet pjesëmarrja në trajnime jashtë vendit, ku fokus janë ata.
“Organizime apo trajnime të tilla mendoj se ndikojnë në një formë mjaft pozitive tek adoleshentët dhe gjithashtu tek nxënësit e moshave pjesëmarrëse, meqenëse atje ne do të arrijmë që të ndërveprojmë me nxënës të tjerë dhe gjithashtu të njohim njerëz të rinj. Të njohim kultura dhe tradita nga vende më të ndryshme”, ka thënë nxënësi, Orges Zeka.
Për delagacionin, kosovar problematike ka qenë pjesë e sigurimit të shpenzimeve të udhëtimit.
“Delegacioni gjerman ka hequr dorë nga mjetet që u takojnë atyre dhe na kanë ndihmuar neve, por prapë kjo shumë nuk e mbulon 100% koston e udhëtimit. Shpresoj që pas kthimit DKA-ja do t’i kompensojë prindërit që kanë kontribuar”, ka pohuar profesori, Nika.
Zvicra, si organizuese ka mbuluar shpenzimet e akomodimit dhe ushqimit.
