Nxënësit e shkollës “Lismir” dhe të gjitha shkollave të tjera të Fushë-Kosovës do u rikthehen bankave shkollore pas disa ditësh vonesë.
Vërshimet që kapluan Fushë-Kosovën bënë që procesi mësimor të shtyhej.
“Lagjet tashmë nuk janë të vërshuara prej ujit, kalimi nëpër to është më i sigurt edhe mundemi me filluar procesin edukativo- arsimor prej të hënës. Kemi sanuar edhe problemet që kemi pasur me ngrohje, tash në tri shkolla kemi vendos kaldaja e reja për ngrohje. Në shkollën ekonomike sot është duke u bërë testimi gjithashtu edhe në shkollën “Mihal Grameno” do të kemi sistemin e ri të ngrohjes”, deklaroi drejtori i Arsimit në Fushë-Kosovë, Adriatik Zeqiri.
“Lismiri” ishte një ndër shkollat që e pësoi më së shumti nga vërshimet e ditëve të fundit.
“Gjendja në shkollën “Lismiri” ka qenë alaramnte për shkak se mundësit për me u fut uji në objektin e shkollës, mirëpo pas intervenimit që kemi bërë me bashkëfshatarët kemi hapë dy kanale në oborrin e shkollës dhe e ka bërë të mundshme lëvizjen e ujit dhe kemi dëmtime në oborrin e shkollës, një pjesë të sallës së sportit. Por jo në objektin kryesorë të shkollës ku uji nuk ka arrit të depërtoj aty gjendja është stabile”, tregoi drejtori i kësaj shkolle, Uran Tërnava.
Përkundër këtyre vështirësive, drejtori Tërnava tregon se ishin të gatshëm që nga mesjava që ta rinisin mësimin.
“Ne qysh nga e marta apo e mërkura kemi pasur mundësi realisht me vazhduar me proces mësimorë të rregullt, mirëpo ka qenë vendimi i DKA-së që me u shty procesi mësimorë deri ditën e hënë. Kështu që shkolla është e gatshme nxehje kemi, dru kemi gjithçka është që me filluar procesi mësimorë qysh ditën e hënë”, tha ai.
Situatë të ngjashme nga vërshimet kishte edhe në qytetin e Drenasit, Klinës dhe Malishevës.
