Familja Sefedini nga Sllatina e Epërme e Vitisë tash e katër ditë është nikoqire e dy mysafireve të veçanta.
Që nga e hëna në konakun e kësaj familje janë duke qëndruar dy vajza nga Bosnja.
Amna Muharemović dhe Amina Ručić nga Sarajeva, për afër një javë do të rrinë tek kjo familje kosovare.
Mirëpritja që kanë marrë u ka lënë përshtypje këtyre të rejave.
“Të gjithë na kanë treguar si shqiptarët janë njerëzit që vlerësojnë më së shumti mysafirët e tyre, dhe kjo është e vërtetë. Na kanë pritur shumë mirë kur kemi ardhur, menjëherë na kanë pranuar dhe na kanë thënë të ndihemi si në shtëpi.. Kemi dëgjuar për Kosovën falë disa filmave dhe serive, edhe disa familjarë të mi kanë qenë në Kosovë me punë, e gjithmonë kam pasur qejf të vizitoj këtë qytet, por nuk e kam pasur rastin. Janë disa dallime të vogla, e nga ëmbëlsirat unë e dua më së shumti bakllavën, e bakllava këtu është shumë më e mirë se në Bosnjë”, thotë ajo.
Ato kanë rrëfyer për Tëvë 1, përshtypjet e tyre gjatë kësaj vizite në Kosovë.
“Kohën e kalojmë super sepse kalojmë me kulturën e tyre dhe qytetet përreth. Gjuha e tyre më duket shumë e rëndë, Gjithçka ka qenë e veçantë për mua, e më interesantja ka qenë Prishtina, si një qytet i plotë. Ushqimi është shumë i ngjashëm me tonin, bakllavat janë shumë të ngjashme me tonat, kam provuar trileçen ato janë super të mira”, thotë Amna Muharremoviç.
Valentin Sefedini, e cila ka pranuar të mirëpres në familjen e saj këto dy të reja ka treguar si po kalojnë se bashku me mysafiret nga Bosnja.
“Prindërit e mijë janë shumë të kënaqur dhe po kalojmë shumë momente të mira bashkë, po lëshojmë valle shqiptare, edhe ato njëkohësisht po na lëshojnë vallet e Bosnjës, prindërit e mijë i kanë pritur shumë mirë”, thotë ajo.
E këtu për disa ditë është duke qëndruar edhe shoqja e Valentinës, Erda Zuka.
“Kemi biseduar pak edhe për çështjen e luftës të Kosovës dhe Sarajevës, se çfarë kanë të përbashkët edhe dje që kemi qenë në Prekaz iu ka ardhur interesant dhe na kanë treguar se edhe këta e kanë pasur shumë keq situatën gjatë luftës në Sarajevë”, shprehet ajo.
Muharemović dhe Ručić janë në mesin e 13 nxënësve nga Bosnja të cilët kanë ardhur në Kosovë.
Të gjithë këta janë strehuar nëpër familjet kosovare në Viti.
E të enjten këta nxënës nga Bosnja u priten edhe nga kryetari i komunës, Sokol Haliti.
“Ne kemi bashkëpunim edhe me shkollat gjermane edhe nivel arsimor si dhe me komunat kroate. Por bashkëpunimin me shkollën e Sarajevës ka qenë tepër interesante”, tha ai.
Pas kësaj vizite edhe nxënësit nga shkolla “Kongresi i Manastirit” në Pozheran të Vitisë, pritet të shkojnë në Bosnje.
