Nol Nushi nga Partia Socialdemokrate ka deklaruar se ftesa e Kurtit për kryetarin e Lidhjes Demokratike të Kosovës, Lumir Abdixhiku për një takim konsultativ është synim i Kurtit për përçarje më të thellë të këtij subjekti politik.
Sipas Nushit ai përveç përçarjes po synon edhe që ta marrë një grup të LDK-së sepse po ia nuhat që qëndrueshmërinë e kanë më të dobët aktualisht.
“Kurti jo rastësisht i ka dërguar ftesë LDK-së sepse e kanë parë që pozicioni i LDK-së është lehtësisht më i cenueshmi. Pas zgjedhjeve përveç rënies së Kurtit u shpërfaqën edhe problemet e brendshme në këtë parti, prandaj Kurti jo rastësisht e tenton LDK-në në mënyrë që ti fus ata në përplasje të brendshme dhe ta ushqejë atë përplasje të vazhdueshme që po e ka ky subjekt. Absolutisht po e synon një lloj përçarje më të thellë të LDK-së dhe për ta marrë një grup të kësaj partie sepse po ia nuhat që qëndrueshmërinë e kanë më të dobët, po e nuhat që rezultati i zgjedhjeve më së rëndi e ka goditur LDK-në dhe unë besoj që ai po e sheh cili është më i dobëti në qëndrueshmëri që ta godas më këto ftesa”, ka thënë ai në emisionin “Ditari” në Tëvë1.
I pyetur se kë nga LDK-ja mund ta bëjë për vete Kurti në këtë rast, Nushi ka thënë se nuk e di si janë qëndrimet e brendshme aty por që sipas tij qartazi nuk janë njëzëri deputetët dhe përfaqësuesit e LDK-së.
Ndryshe, kryeministri në detyrë, Albin Kurti, i ka dërguar ftesë kryetarit të Lidhjes Demokratike të Kosovës-së, Lumir Abdixhikut për një takim për konsulta paraprake, në prag të konstituimit të Kuvendit të Kosovës pas zgjedhjeve të 9 shkurtit.
Në letrën e dërguar Kurti ka kërkuar takim këtë javë me Abdixhikun, duke ofruar si opsion datën 9 prill dhe 10 prill.
“Me certifikimin e rezultateve përfundimtare të zgjedhjeve parlamentare të 9 shkurtit 2025 nga Komisioni Qendror i Zgjedhjeve, siç e dini edhe Presidentja e ka caktuar mbledhjen e parë të Legjislaturës së Nëntë të Kuvendit të Republikës së Kosovës për datë 15 prill 2025. Me qëllim të konstituimit të plotë të Kuvendit të Republikës së Kosovës dhe procesit të zgjedhjes së Qeverisë së re, për t’u konsultuar paraprakisht, ju ftoj në takim të mërkurën, me datë 9 prill, në orën 15:00, apo të enjten, me datë 10 prill, në orën 9:00 ose në 14:00. Mirëpres përgjigjen tuaj për këtë takim”, shkruhet në letër./teve1.info/
