Edhe pas gati dy vitesh, qytetarëve të Skenderajt ende nuk u janë kompensuar dëmet e shkaktuara nga reshjet e shiut. Si derë e parë e qytetarëve, që nga shkurti i vitit 2023, ata i drejtohen komunës me ankesa për t’i përcjellur ato te niveli qendror. Përveç kësaj, kjo komunë, e udhëhequr nga opozita, vlerëson se është diskriminuar sa i përket shpërndarjes buxhetore dhe të projekteve.
Kështu thotë kryetari i Skenderajt, Fadil Nura në një intervistë për KosovaPress, derisa nënvizon se “mbështetja qeveritare ka qenë zero gjatë këtij mandati”.
Përveç kësaj, Nura flet për pritshmëritë nga zgjedhjet e 9 shkurtit 2025, duke përmendur kontratat njëburimore, korrupsionin e aferat si dështimet kryesore të qeverisë Kurti.
“Sfidë për neve, jo vetëm për neve si pushtet lokal por për të gjitha komunat ka qenë kontrata kolektive në arsim të cilat na kanë goditur në kuptimin e realizimit të projekteve kapitale, sepse buxheti na është marrë nga projekt kapitale dhe kategoritë tjera, gjë që neve na ka sfiduar në këtë drejtim…Kemi ende sfida dhe probleme të trashëguara nga vërshimet që i kemi pasur para dy vitesh…Nga niveli qendror, përjashtimisht ekonomitë familjare janë kompensuar dikush në masën 70-80 për qind. Ndërkohë që bizneset, infrastruktura publike dhe bujqësia dhe një pjesë bukur e madhe nuk janë kompensuar fare. A ka ankesa në komunë për këtë? Sigurisht që qytetarët kërkojnë direkt nga komuna përgjigje për çka në këtë rast, përgjegjësia ligjore është e Qeverisë së Republikës së Kosovës në nivel nacional. A keni bërë kërkesa për këtë? Sigurisht, raportet bashkë me kërkesat dhe ashtu qysh parasheh procedura ligjore kemi përcjellë në nivelin qendror dhe ende nuk ka përgjigje në këtë drejtim”, thotë Nura.
Nura tregon se qeveria nuk ka bërë asnjë hap në funksionalizimin e rrugës me katër korsi Komoran-Klinë e Epërme.
“Përkrahja ka qenë pothuajse gati zero. Kemi pasur një diskriminim në kuptimin e shpërndarjeve buxhetore dhe projekteve që janë shpërndarë nëpër komuna, siç ka qenë praktikë e çdo hershme. Gjithë realizmin e objektivave tona jemi detyruar ta ndërtojmë mbi bazën e planifikimeve vetanake dhe buxhetin vetanak komunal dhe bashkëpunimit me organizata të ndryshme ndërkombëtare dhe vendore. A ka ndonjë projekt që është stopuar dhe nuk po mund të ecë përpara për shkak të mos përkrahjes të nivelit qendror? Rruga me katër korsi që është Komoran-Klinë e Epërme, pjesët ku kanë qenë të pa përfunduar ne kemi marrur përsipër t’i zgjedhim problemet pronësore, ndërkohë që qeveria nuk ka bërë ndonjë hap në këtë drejtim”, potencon Nura.
I pari i Skenderajt, Fadil Nura pret që Partia Demokratike e Kosovës të del e para në zgjedhjet e 9 shkurtit 2025.
“Unë PDK-në e shoh si parti të parë. Tanimë veç po shihen efektet e para. Kandidati për kryeministër është prit jashtëzakonisht mirë dhe po pritet çdoherë e më shumë në kuptimin e saj që ai po prezanton sa i përket zhvillimit ekonomik dhe problemeve që sot ballafaqohen qytetarët…Gjatë këtyre katër vite të qeverisjes Kurti cilat i shihni si dështime kryesore? Nuk e di fushë që nuk ka pasur dështim kjo qeveri. Sot niveli është galopant i korrupsionit. Kontratat njëburimore, pastaj aferat e përditshme. Reforma në drejtësi është krejtësisht një përrallë në vete. Iniciativat që kanë rrjedhur dhe kushtetuesja i ka rrëzuar. Është krejtësisht një film me fantazi”, thekson Nura.
Ndërkaq, Nura e quan të padiskutueshme fitoren në rast rikandidimi për kryetar.
“Rikandidimi im sigurisht do të varet edhe nga vullneti i strukturave të partisë dhe performanca në raport me kërkesat e qytetarëve…Nëse rikandidoni a pritni të fitoni? Është e padiskutueshme”, thotë Nura.
Përveç këtyre, si projektet më të rëndësishme për vitin 2025, Nura përmendi vazhdimin e ndërtimit të banesave sociale dhe trajtimin e ujërave të zeza
