Janë arrestuar 26 zyrtarë policorë në pikën kufitare të Vërmicës, nën dyshimin për keqpërdorim të pozitës zyrtare dhe marrjes së ryshfetit.
E gjithë kjo është zhvilluar në kuadër të aksionit “Pika 2”, i cili me urdhër të Prokurorisë Speciale u realizua nga Inspektorati Policor i Kosovës.
Nga pika kufitare e Vërmicës të arrestuarit janë sjellë në qendrën e Inspektoratit Policor.
Me anë të një komunikate, IPK-ja ka bërë të ditur se në këtë rast janë përdorur edhe masat e fshehta teknike gjatë hetimeve.
“Me autorizimin e Prokurorisë Speciale në kuadër të këtij hetimi nga hetuesit e IPK-së janë përshirë edhe masat e fshehta dhe teknike të vëzhgimit dhe hetimit si dhe masat e nevojshme që të zbulojnë dhe të ruajnë gjurmët dhe provat tjera të veprave penale dhe sendet të cilat mund të shërbejnë si prova të cilat mund të përdoren në procedurë penale.
Bazuar në këto veprime të suksesshme hetimore, IPK në kuadër të operacionit “Pika 2” ka arrestuar sot 26 zyrtarë policorë (duke përfshirë dy rreshterë policorë dhe 24 zyrtarë policorë).”
Ky aksion ishte i koordinuar edhe me autoritet e Republikës së Shqipërisë. Kjo u tha edhe në komunikatën e Prokurorisë Speciale.
“Hetimi ka përfshirë edhe bashkëpunimin me prokurorë nga SPAK-u (Struktura e Posaçme kundër korrupsionit dhe krimit të organizuar e Republikës së Shqipërisë) dhe zyrtarët e AMP-së Agjencisë për Mbikëqyrje Policore (agjencia homologe e IPK-së në Shqipëri) që ka rezultuar me arrestimin e disa të dyshuarve edhe në Republikën e Shqipërisë.”
Në anën tjetër, Prokuroria e Posaçme kundër Korrupsionit dhe Krimit të Organizuar (SPAK) në Shqipëri ka njoftuar sot arrestimin e 17 punonjësve të policisë shqiptare në pikën kufitare të Morinës.
Ky është aksioni i dytë që po zhvillohet brenda pak javësh për korrupsionin në pikat kufitare të Kosovës. Në aksionin e parë të IPK janë arrestuar 48 zyrtarë policorë dhe dy doganierë.
Raporti i gazetarit Valmir Gallopeni.
