Prokuroria Themelore në Gjilan ka konfirmuar se Policia e Kosovës është duke zbatuar autorizimin e kësaj prokurorie lidhur me hetimet në disa komuna të rajonit të Gjilanit.
Sipas përgjigjes së Prokurorisë për televizionin Tëvë1, deri më tani janë intervistuar kryesues të qendrave, komisionerë dhe dëshmitarë, ndërsa janë pranuar gjithsej 16 kallëzime penale për komunat e Vitisë dhe Kllokotit, të cilat janë duke u trajtuar në procedurë të rregullt.
“Referuar kërkesës tuaj për informacion të parashtruar sot me datë 10 shkurt 2026, ju njoftojmë se Policia e Kosovës është duke e zbatuar autorizimin e Prokurorisë Themelore në Gjilan, sipas të cilit janë intervistuar kryesues të qendrave, komisionerë, dëshmitarë dhe deri më tani kemi pranuar 16 kallëzime penale për Komunën e Vitisë dhe Kllokotit, të gjitha në procedurë të rregullt,” thuhet në përgjigjen e Prokurorisë.
Tutje, Prokuroria ka bërë të ditur se për shkak të numrit të madh të personave të përfshirë, procesi i intervistimit ende është duke vazhduar në Komunën e Gjilanit, ndërsa më pas do të shtrihet edhe në komunat e tjera që janë në kompetencë të Prokurorisë Themelore në Gjilan.
“Përderisa, për shkak të numrit të madh të personave të përfshirë, akoma procesi i intervistimit është duke vazhduar për Komunën e Gjilanit dhe më pas edhe në komunat tjera që janë në kompetencë të Prokurorisë Themelore në Gjilan,” ka thënë Prokuroria.
